ന്യൂഡല്‍ഹി: മുന്‍ ഇന്ത്യന്‍ ക്രിക്കറ്റ് നായകന്‍ മഹേന്ദ്ര സിംഗ് ധോണി ഏകദിന ടീമില്‍ നിന്നും ഉടന്‍ വിരമിച്ചേക്കുമെന്ന സൂചന നല്‍കി മുഖ്യ പരിശീലകന്‍ രവിശാസ്ത്രി. ധോണിയുമായി താന്‍ സംസാരിച്ചിരുന്നു. ടെസ്റ്റ് കരിയര്‍ ധോണി നേരത്തെ അവസാനിപ്പിച്ചതാണെന്നും ഏകദിനത്തോടും ധോണി ഉടന്‍ വിടപറഞ്ഞേക്കുമെന്നും രവിശാസ്ത്രി വ്യക്തമാക്കി.
ട്വിന്റി 20 ഫോര്‍മാറ്റിലായിരിക്കും ധോണി ഇനി ശ്രദ്ധ കേന്ദ്രീകരിക്കുകയെന്നും രവിശാസ്ത്രി പറഞ്ഞു. ഇന്ത്യന്‍ പ്രീമിയര്‍ ലീഗില്‍ മികച്ച പ്രകടനം കാഴ്‌ച്ചവെച്ചാല്‍ വരുന്ന ട്വന്റി 20 ലോകകപ്പില്‍ ധോണി ടീമിലുണ്ടാകും.
ഐപിഎല്‍ കളിക്കാന്‍ ധോണി തയ്യാറെടുക്കുകയാണെന്നും അദ്ദേഹം കൂട്ടിച്ചേര്‍ത്തു. ടീമില്‍ ഒരു കാരണവശാലും കടിച്ചു തൂങ്ങി കിടക്കുന്ന ആളല്ല ധോണി. ഐപിഎല്ലില്‍ തീര്‍ച്ചയായും ധോണി കളിക്കുമെന്നും സീസണിലെ പെര്‍ഫോമന്‍സ് ധോണിയുടെ ഭാവി നിര്‍ണയിക്കുമെന്നും അദ്ദേഹം പറഞ്ഞു.
ലോകകപ്പ് പോലുള്ള വലിയ ടൂര്‍ണമെന്റുകളിലേക്ക് താരങ്ങളെ പരിഗണിക്കുമ്പോള്‍ അവരുടെ പ്രകടന മികവും പരിചയ സമ്പത്തും മാത്രമായിരിക്കും ഘടകങ്ങളെന്നും രവിശാസ്ത്രി പറഞ്ഞു.
