ക്വലാലംപൂര്: മലേഷ്യന് മാസ്റ്റേഴ്സില് പുരുഷവിഭാഗം കിരീടത്തിനായി ജപ്പാന്റെ ലോക ഒന്നാം നമ്പര് കെന്റോ മൊമോട്ട ഇന്നിറങ്ങും. എതിരാളി ഡെന്മാര്ക്കിന്റെ വിക്ടര് ആക്സല്സണാണ്. മലേഷ്യയുടെ പ്രതീക്ഷയായിരുന്ന ലീ സീ ജിയയെ 21-10, 21-19നാണ് മൊമോട്ടോ തോല്പ്പിച്ചത്. ഫൈനലില് കടന്ന ആക്സല്സണ് 21-14, 21-18ന് ഹോങ്കോംഗിന്റെ ആന്ഗസ് ലോംഗിനെയാണ് സെമിയില് കീഴടക്കിയത്.
വനിതാ വിഭാഗത്തില് ലോക ഒന്നാം നമ്പര് തായ്വാന്റെ സൂ യിംഗ് തായിയോട് ഇന്ത്യയുടെ ലോകചാമ്പ്യന് പി.വി.സിന്ധു ക്വാര്ട്ടറില് അടിയറ പറഞ്ഞിരുന്നു. 16-21, 17-21 നാണ് സിന്ധു തോല്വി സമ്മതിച്ചത്. ഇതോടെ ലോകചാമ്പ്യന് പട്ടത്തിന് ശേഷം ഒരു കിരീടമെന്ന പ്രതീക്ഷ സിന്ധുവിന് ഇനിയും അകലെയായിരിക്കുന്നു.
സിന്ധുവിനൊപ്പം ഇറങ്ങിയ ഒളിമ്പിക് മെഡല് ജേതാവ് സൈന നെഹവാള് തീര്ത്തും ദുര്ബലമായ രീതിയിലാണ് പുറത്തായത്. സ്പെയിനിന്റെ ഒളിമ്പിക് സുവര്ണതാരം സ്പെയിനിന്റെ മാറിന് 8-21, 7-21ന് സൈനയെ തകര്ത്തുകളഞ്ഞു.വനിതകളുടെ ഫൈനലിലേക്ക് തായ്വാന്റെ തായ് സൂ യിംഗ് കടന്നു, ചൈനയുടെ ഹീ ബിന്ജിയാവോയെ 21-17, 21-12 നാണ് തോല്പ്പിച്ചത്.
