സിംഗപ്പൂര്‍: ഇന്ത്യന്‍ ബാഡ്മിന്റണ്‍ ആരാധകര്‍ കാത്തിരുന്ന നിമിഷം. നീണ്ട രണ്ട് വര്‍ഷത്തെ കിരീട വരള്ച്ചയ്ക്ക് വിരാമമിട്ടുകൊണ്ട് ഇന്ത്യയുടെ സൂപ്പര്‍ സഖ്യമായ സാത്വിക്‌സായ്രാജ് രങ്കിറെഡ്ഡി – ചിരാഗ് ഷെട്ടി ജോഡിക്ക് സിംഗപ്പൂര്‍ ഓപ്പണ്‍ 2026 കിരീടം. ഞായറാഴ്ച നടന്ന ആവേശകരമായ പുരുഷ ഡബിള്‍സ് ഫൈനലില്‍ ഇന്തോനേഷ്യയുടെ ഫജര്‍ അല്‍ഫിയാന്‍ – മുഹമ്മദ് ഷോഹിബുല്‍ ഫിക്രി സഖ്യത്തെയാണ് ഇന്ത്യന്‍ സഖ്യം കീഴടക്കിയത്. മൂന്ന് ഗെയിമുകള്‍ നീണ്ടുനിന്ന കടുത്ത പോരാട്ടത്തിനൊടുവിലായിരുന്നു സാത്വിക്-ചിരാഗ് സഖ്യത്തിന്റെ കിരീടനേട്ടം. സ്‌കോര്‍: 18-21, 21-17, 21-16.
ആദ്യ ഗെയിം 18-21 ന് നഷ്ടമായിട്ടും തളരാതെ പോരാടിയ ഇന്ത്യന്‍ സഖ്യം അടുത്ത രണ്ട് ഗെയിമുകളും തങ്ങളുടെ പരിചയസമ്പത്ത് മുഴുവന്‍ പുറത്തെടുത്ത് സ്വന്തമാക്കുകയായിരുന്നു. രണ്ടാം ഗെയിമില്‍ ശക്തമായി തിരിച്ചടിച്ച സാത്വിക്-ചിരാഗ് ജോഡി 21-17 ന് ഗെയിം പിടിച്ചെടുത്ത് മത്സരത്തിലേക്ക് തിരിച്ചെത്തി. നിര്‍ണ്ണായകമായ മൂന്നാം ഗെയിമിലും ഇതേ മികവ് തുടര്‍ന്ന അവര്‍ 21-16 ന് ഇന്തോനേഷ്യന്‍ സഖ്യത്തെ തകര്‍ത്ത് കിരീടത്തില്‍ മുത്തമിട്ടു.
രണ്ട് വര്‍ഷത്തെ ഇടവേളയ്‌ക്ക് ശേഷമുള്ള സാത്വിക്-ചിരാഗ് സഖ്യത്തിന്റെ ആദ്യ അന്താരാഷ്‌ട്ര കിരീടനേട്ടമാണിത്. ടൂര്‍ണമെന്റിലുടനീളം കടുത്ത വെല്ലുവിളികള്‍ മറികടന്നായിരുന്നു ഇന്ത്യയുടെ ഈ കിരീടധാരണം. സെമിഫൈനലില്‍ നിലവിലെ ലോക ഒന്നാം നമ്പര്‍ സഖ്യമായ കൊറിയയുടെ കിം വോണ്‍ ഹോ – സിയോ സങ് ജേ ജോഡിയെ അട്ടിമറിച്ചാണ് സാത്വികും ചിരാഗും ഫൈനലിലേക്ക് യോഗ്യത നേടിയിരുന്നത്. ആ തകര്‍പ്പന്‍ ഫോം ഫൈനലിലും നിലനിര്‍ത്താന്‍ കഴിഞ്ഞതോടെ സിംഗപ്പൂര്‍ ഓപ്പണ്‍ വേദിയില്‍ ഇന്ത്യന്‍ ദേശീയ ഗാനം മുഴങ്ങി.
