കോഴിക്കോട്: ഇന്ത്യയില്‍ ചെസ് കളിയെ ജനകീയമാക്കിയ ലോക ചെസ് ഫെഡറേഷന്‍ മുന്‍ വൈസ് പ്രസിഡന്റ് പി ടി ഉമ്മര്‍കോയ അന്തരിച്ചു. കോഴിക്കോട് പന്നിയങ്കര സ്വദേശിയായ ഉമ്മര്‍കോയക്ക് 69 വയസായിരുന്നു. ശ്വാസകോശ സംബന്ധമായ അസുഖത്തെത്തുടര്‍ന്ന് ഏറെ നാളായി ചികിത്സയിലായിരുന്നു. ചൊവ്വാഴ്ച പുലര്‍ച്ചെയായിരുന്നു അന്ത്യം.
കേരളത്തിലും ഇന്ത്യയിലും ചെസിനെ ജനകീയമാക്കുന്നതില്‍ നിര്‍ണായ പങ്കു വഹിച്ചു. കാലിക്കറ്റ് യൂണിവേഴ്‌സിറ്റി ചെസ് ക്ലബ്ബെന്ന സംഘടന ആരംഭിച്ചായിരുന്നു തുടക്കം. ഇന്ത്യയില്‍ 60ഓളം ഗ്രാന്റ് മാസ്റ്റര്‍മാരെ കണ്ടെത്തുന്നതിലും വളര്‍ത്തുന്നതിലും പ്രധാന പങ്കുവഹിച്ചു. 1985ലാണ് അഖിലേന്ത്യ ചെസ് ഫെഡറേഷന്‍ ജോയിന്റ് സെക്രട്ടറിയായി ചുമതലയേറ്റത്. 2005 വരെ തുടര്‍ന്നു. 1996 മുതല്‍ പത്തു വര്‍ഷക്കാലം ലോക ചെസ് ഫെഡറേഷന്‍ വൈസ് പ്രസിഡന്റായും പ്രവര്‍ത്തിച്ചു.
ചെസിന്റെ വളര്‍ച്ചക്കായി നിരവധി രാജ്യങ്ങള്‍ സന്ദര്‍ശിച്ചു. 1989ല്‍ ചെസിനെക്കുറിച്ചുള്ള മാഗസിനും ആരംഭിച്ചു. രാഷ്‌ട്രീയ സാമൂഹിക രംഗത്തെ പ്രമുഖ വ്യക്തികളോടും അദ്ദേഹം ഏറെ അടുപ്പം പുലര്‍ത്തി.
ഖബറടക്കം ഇന്ന് രാത്രി 10 മണിയ്‌ക്ക് പന്നിയങ്കര ജുമാമസ് ജിദില്‍ നടക്കും.
