ബംഗളൂരു: ഇന്ത്യ-ഓസ്ട്രേലിയ ഏകദിന പരമ്പരയിലെ നിര്ണായകമായ മൂന്നാമത്തേയും അവസാനത്തേയും മത്സരം ഇന്ന്. ഉച്ചതിരിഞ്ഞ് 1.30ന് ബംഗളൂരുവിലാണ് മത്സരം നടക്കുക. കഴിഞ്ഞ മത്സരത്തിലെ വിജയം നല്കുന്ന ആത്മവിശ്വാസത്തില് ടീം ഇന്ത്യ ഇറങ്ങുമ്പോള് പരമ്പര കൈവിടാതിരിക്കാനാകും ഓസീസ് ശ്രമിക്കുക. ബംഗളൂരുവില് മഴ വില്ലനാകാനുള്ള സാധ്യതയും നിലനില്ക്കുന്നുണ്ട്.
ഓപ്പണര് ശിഖര് ധവാന് മികച്ച ഫോമിലാണെന്നത് ഇന്ത്യക്ക് ഏറെ ആത്മവിശ്വാസം നല്കുന്നു. പരിക്കില് നിന്ന് മുക്തനായി തിരിച്ചെത്തിയ ശേഷം കളിച്ച മൂന്ന് മത്സരങ്ങളില് ധവാന് അര്ധ സെഞ്ച്വറി നേടിയിരുന്നു. രാജ്കോട്ടില് സെഞ്ച്വറിക്ക് വെറും നാല് റണ്സ് മാത്രം അകലെയാണ് ധവാന് പുറത്തായത്. ഇടവേളക്ക് ശേഷം തിരിച്ചെത്തിയ രോഹിത് ശര്മ്മയും ഫോമിലേക്ക് ഉയരുന്നതിന്റെ സൂചനകള് പ്രകടിപ്പിക്കുന്നതും ഒപ്പം വിരാട് കോഹ്ലിയും കെ.എല് രാഹുലും ഉത്തരവാദിത്തം ഏറ്റെടുത്ത് ബാറ്റ് ചെയ്യുന്നതും ഓസീസിന് തലവേദനയാണ്. ഷമി, ബൂമ്ര, സെയ്നി, കുല്ദീപ് തുടങ്ങിയവരും ഫോമിലാണ്.
മറുഭാഗത്ത് ഓപ്പണര്മാര് തന്നെയാണ് ഓസ്ട്രേലിയയുടെ മുതല്ക്കൂട്ട്. ഫിഞ്ചും വാര്ണറും നല്കുന്ന മികച്ച തുടക്കമാണ് പലപ്പോഴും ഓസീസിനെ തുണക്കാറ്. ആദ്യ മത്സരത്തില് 256 റണ്സ് പിന്തുടര്ന്ന ഓസീസ് 10 വിക്കറ്റിന് വിജയിച്ചപ്പോള് ഇരുവരും സെഞ്ച്വറി നേടിയിരുന്നു. സ്റ്റീവ് സ്മിത്തും ലബുഷെയിനും മികച്ച പ്രകടനമാണ് കഴിഞ്ഞ മത്സരത്തില് പുറത്തെടുത്തത്. സ്റ്റാര്ക്കും കമ്മിന്സും സാംപയുമുള്പ്പെടുന്ന ബൗളിംഗ് നിര ഏത് ടീമിനെയും പിടിച്ചുകെട്ടാന് കഴിവുള്ളവരാണ്.
ആദ്യ മത്സരത്തില് ഇന്ത്യയെ 10 വിക്കറ്റിന് പരാജയപ്പെടുത്തിയ ഓസീസ് രണ്ടാം മത്സരത്തില് ഇന്ത്യക്ക് മുന്നില് കീഴടങ്ങിയിരുന്നു. രാജ്കോട്ടില് നടന്ന മത്സരത്തില് 36 റണ്സിനാണ് ഇന്ത്യ സന്ദര്ശകരെ കീഴടക്കിയത്. ഇതോടെ മൂന്ന് മത്സര പരമ്പരയില് ഇരു ടീമുകളും ഓരോ മത്സരം വീതം വിജയിച്ചതോടെ ഇന്നത്തെ മത്സരം നിര്ണായകമായിരിക്കുകയാണ്.
