സിഡ്നി: കനത്ത നാശം വിതച്ച ഓസ്ട്രേലിയയിലെ കാട്ടുതീ ദുരിതാശ്വാസ നിധിക്കായുള്ള ക്രിക്കറ്റ് മത്സരത്തിന് പ്രമുഖരെല്ലാം രംഗത്ത്. റിക്കിപോണ്ടിംഗ് ഇലവനും ഷെയിന് വോണ് ഇലവനും തമ്മിലുള്ള മത്സരങ്ങളുടെ സെലിബ്രിറ്റി കോച്ചുകളായി ക്രിക്കറ്റ് ഇതിഹാസം സച്ചിന് തെണ്ടുല്ക്കറും വെസ്റ്റ് ഇന്ഡീസ് മുന് ലോകോത്തര പേസ് ബൗളര് കോട്ട്ണീ വാല്ഷും എത്തിച്ചേരുമെന്ന് സംഘാടകരറിയിച്ചു. നോണ് പ്ലേയിംഗ് നായകന്മാരായി സ്റ്റീവ് വോയും മെല് ജോണ്സനും ടീമുകള്ക്കൊപ്പമുണ്ട്. ഓസ്ട്രേലിയയുടെ ഒട്ടുമിക്ക മുന്താരങ്ങളും ചാരിറ്റി ക്രിക്കറ്റിനായി ടീമുകള്ക്കൊപ്പം ചേരും.
‘ലോകോത്തര ക്രിക്കറ്റ് താരങ്ങളായ സച്ചിനേയും വാല്ഷിനേയും സ്വീകരിക്കാന് ഓസ്ട്രേലിയ ഒരുങ്ങിക്കഴിഞ്ഞു. ഓസ്ട്രേലിയന് മണ്ണില് സ്വന്തമായി നിരവധി നേട്ടങ്ങള് കൊയ്തവരാണ് സച്ചിനും കോട്ട്ണീ വാല്ഷും.’ക്രിക്കറ്റ് ഓസ്ട്രേലിയ സിഇഒ കെവിന് റോബെര്ട്ട്സ് പറഞ്ഞു.
‘രണ്ടു താരങ്ങളും ഐസിസിയുടെ ഹാള് ഓഫ് ഫെയിം ബഹുമതി നേടിയവരാണ്. ലോകക്രിക്കറ്റിലെ ഏറ്റവും വലിയ റണ്വേട്ടകാരനാണ് സച്ചിന്. 500 വിക്കറ്റുകള് വീഴ്ത്തിയ വാല്ഷിന്റെ ബൗളിംഗ് മികവ് ഒരു കാലത്ത് ക്രിക്കറ്റ് ആരാധകര് ആവേശത്തോടെ കണ്ടതാണ്’ കെവിന് സൂചിപ്പിച്ചു. ഫെബ്രുവരി 8നാണ് ദുരിതാശ്വാസ നിധിക്കായുള്ള ക്രിക്കറ്റ് മത്സരം നടക്കാന് പോകുന്നത്. സ്ഥലം തീരുമാനിച്ചിട്ടില്ല. അന്നു തന്നെ ഓസ്ട്രേലിയയും ഇന്ത്യയും തമ്മിലുള്ള ടി20 വനിതാ ക്രിക്കറ്റും നടക്കുന്നുണ്ട്.
