ലണ്ടന്‍: പ്രീമിയര്‍ ലീഗില്‍ 24-ാം റൗണ്ട് പോരാട്ടങ്ങളില്‍ ചെല്‍സിയെ ആഴ്‌സണല്‍ തളച്ചപ്പോള്‍ മാഞ്ചസ്റ്റര്‍ സിറ്റിയും ആസ്റ്റണ്‍ വില്ലയും ജയം നേടി. മറ്റ് മത്സരങ്ങളില്‍ ബേണ്‍മൗത്തും സതാംപ്ടണും മുന്നേറിയപ്പോള്‍ എവര്‍ട്ടണ്‍-ന്യൂകാസില്‍ മത്സരം സമനിലയിലായി.
ചെല്‍സിയുടെ ജയം അവസാന നിമിഷങ്ങളില്‍ നിഷേധിച്ചുകൊണ്ടാണ് ആഴ്‌സണല്‍ വീര്യം കാണിച്ചത്. കളിയുടെ തുടക്കത്തില്‍ 26-ാം മിനിറ്റില്‍ ഡേവിഡ് ലൂയിസ് ചുവപ്പുകാര്‍ഡു കണ്ട് പുറത്തുപോയിട്ടും ആഴ്‌സണല്‍ പതറിയില്ല. സമനില പോലും ജയത്തിന് തുല്യമായി. കളി തുടങ്ങി 28-ാം മിനിറ്റില്‍ ജോര്‍ഗിനോയുടെ ഗോളിലൂടെ ചെല്‍സി മുന്നിലെത്തി. പിന്നീട് ആദ്യ പകുതിയില്‍ ഗോളടിക്കാനോ ഗോള്‍മടക്കാനോ ഇരുടീമുകള്‍ക്കുമായില്ല. രണ്ടാം പകുതിയില്‍ ഗാബ്രിയേല്‍ മാര്‍ട്ടിനെല്ലിയിലൂടെ 63-ാം മിനിറ്റില്‍ ആഴ്‌സണല്‍ സമനില നേടി. എന്നാല്‍ 84-ാം മിനിറ്റില്‍ സീസര്‍ ആസ്പിലികേറ്റ ചെല്‍സിയെ വീണ്ടും 2-1ന് മുന്നിലെത്തിച്ചു. ഇതിനിടെ ഹെക്ടര്‍ ബെല്ലെറിന്‍ 87-ാം മിനിറ്റില്‍ ആഴ്‌സണലിന് സമനില ഗോള്‍ നല്‍കി.
മാഞ്ചസ്റ്റര്‍ സിറ്റി എതിരില്ലാത്ത ഒരു ഗോളിനാണ് ഷെഫ് യുണൈറ്റഡിനെ പരാജയപ്പെടുത്തിയത്. പ്രീമിയര്‍ ലീഗില്‍ ഗോള്‍വേട്ട തുടരുന്ന അര്‍ജ്ജന്റീനിയന്‍ സൂപ്പര്‍താരം സെര്‍ഗീ അഗ്യൂറോയാണ് ഏക ഗോള്‍ സിറ്റിക്കായി നേടിയത്.73-ാം മിനിറ്റിലായിരുന്നു അഗ്യൂറോയുടെ ഗോള്‍. മൂന്നാം മത്സരത്തില്‍ ആസ്റ്റണ്‍ വില്ല ഒന്നിനെതിരെ രണ്ടു ഗോളുകള്‍ക്ക് വാട്ട്‌ഫോഡിനെ തോല്‍പ്പിച്ചു. തുടക്കത്തില്‍ 38-ാം മിനിറ്റില്‍ ട്രോയ് ഡീനേയ് വാട്ട്്‌ഫോഡിനെ മുന്നിലെത്തിച്ചു. എന്നാല്‍ രണ്ടാം പകുതിയില്‍ ഡഗ്്‌ളസ് 68-ാം മിനിറ്റിലും ടൈറോണ്‍ മിംഗ്‌സ് 95-ാം മിനിറ്റിലും ഗോള്‍ നേടിക്കൊണ്ട് വില്ലക്ക ജയം നല്‍കി. മറ്റു മത്സരങ്ങളില്‍ സതാംപ്ടണ്‍ എതിരില്ലാത്ത രണ്ടു ഗോളുകള്‍ക്ക് ക്രിസ്റ്റല്‍ പാലസിനെ തകര്‍ത്തപ്പോള്‍,ബേണ്‍മൗത്ത് ഒന്നിനെതിരെ മൂന്ന് ഗോളുകള്‍ ബ്രൈറ്റണെ മറികടന്നു. ഇതിനിടെ എവര്‍ട്ടണ്‍- ന്യൂകാസില്‍ മത്സരം 2-2ന് സമനിലയിലാണ് പിരിഞ്ഞത്.
