ലഖ്നൗ: ലോകരാജ്യങ്ങളെ സഹായിക്കും വിധം ഇന്ത്യ പ്രതിരോധ-ഗവേഷണ രംഗത്ത് ശക്തമായ സാന്നിധ്യമായി മാറിക്കഴിഞ്ഞെന്ന് പ്രതിരോധ മന്ത്രി രാജ്നാഥ് സിംഗ് . ഇന്തോ-ആഫ്രിക്കന് രാജ്യങ്ങളുടെ പ്രതിരോധരംഗത്തെ വിദഗ്ധരടക്കമുള്ള സമ്മേളനത്തിലാണ് കേന്ദ്ര പ്രതിരോധ മന്ത്രി ഇന്ത്യയുടെ നേട്ടങ്ങളെ അക്കമിട്ട് പറഞ്ഞത്.
വിവിധ മേഖലകളിലെ പ്രതിരോധ സംവിധാനത്തെ സമഗ്രമായിട്ടാണ് ഇന്ത്യ കാണുന്നത്. കടലോര -രാജ്യാന്തര സുരക്ഷ, ബഹിരാകാശ ഗവേഷണം എന്നിവയിലടക്കം ഇന്ത്യ സ്വയം വളര്ച്ചയുടെ പാതയിലാണ്. സാമ്പത്തികമായി അവശത അനുഭവിക്കുന്ന രാജ്യങ്ങള്ക്കടക്കം പ്രതിരോധ രംഗത്ത് സഹായിക്കാനും ഇന്ത്യ പ്രതിജ്ഞാ ബദ്ധമാണെന്നും രാജ്നാഥ് സിംഗ് സൂചിപ്പിച്ചു.
സമുദ്രതീര വാര്ത്താവിനിമയ സംവിധാനം, കടല് കടന്നുള്ള കുറ്റകൃത്യം തടയല്, കടല്ക്കൊള്ള, കടലോര മേഖലയിലെ ദുരന്തങ്ങള്, മത്സ്യബന്ധന മേഖലയിലെ അനധികൃത കടന്നുകയറ്റങ്ങള് എന്നിവ നേരിടുന്നതില് ഇന്ത്യ ഇന്ന് സുസജ്ജമാണ്. ഒപ്പം ഭീകരതക്കെതിരെ ഐക്യരാഷ്ട്രസഭയുടെ മാനദണ്ഡമനുസരിച്ചുള്ള ശക്തമായ പ്രതിരോധസംവിധാനം ഒരുക്കിയതായും അദ്ദേഹം വ്യക്തമാക്കി.
ഐക്യരാഷ്ട്ര പൊതുസഭയില് ആഗോളതലത്തിലെ ഭീകരതക്കെതിരെ സമഗ്രപദ്ധതി തയ്യാറാക്കണമെന്നും രാജ്നാഥ് സിംഗ് പറഞ്ഞു. ഇന്ത്യന് എക്സ്പോയില് പങ്കെടുത്ത രാജ്യങ്ങള് ഇതിനായി ഇടപെടണമെന്നും കേന്ദ്രമന്ത്രി അഭ്യര്ത്ഥിച്ചു. പ്രതിരോധ രംഗത്ത് നിര്മ്മാണത്തിലും, സാങ്കേതികവിദ്യയിലും, ഡിജിറ്റല് പ്രതിരോധ സംവിധാനത്തിലും ഇന്ത്യ മുന്നിലാണ്. ഒപ്പം ഗവേഷണത്തിലും ആയുധ നിര്മ്മാണത്തിലും അതിന്റെ അറ്റകുറ്റ പ്പണിയിലും സംയുക്തകരാറുകളിലൂടെ ശക്തമാവുകയാണ് ഇന്ത്യന് പ്രതിരോധ രംഗം. കൂടാതെ പ്രതിരോധ രംഗത്ത് നൂതനമായ ആശയങ്ങള് മുന്നോട്ടുവക്കുന്ന ഏവരേയും പ്രോത്സാഹിപ്പിക്കുന്ന നയമാണ് ഇന്ത്യയുടേതെന്നും രാജ്നാഥ് സിംഗ് ചൂണ്ടിക്കാട്ടി.
രാജ്യാന്തര സഹായങ്ങളെ മുന്നിര്ത്തി പ്രതിരോധ രംഗത്തെ വാഹനങ്ങള് വികസിപ്പിക്കാന് തീരുമാനിച്ചു. ആഴക്കടലില് നിരീക്ഷണം നടത്താനുള്ള കപ്പലുകള്, അതിവേഗ പ്രത്യാക്ര മണ ബോട്ടുകള് എന്നിവ ഇതില് ഉള്പ്പെടും. രാത്രികാല നിരീക്ഷണത്തിന് സൈനികരെ സഹായിക്കുന്ന വാഹനങ്ങള്, ദൂരദര്ശിനികള്, ആളില്ലാ നിരീക്ഷണ ഉപകരണങ്ങള്, ഡോണിയര് വിമാനങ്ങള് തുടങ്ങി നിരവധി പ്രതിരോധ സംവിധാനങ്ങള് ആഫ്രിക്കന് രാജ്യങ്ങളിലേക്ക് കയറ്റുമതി തീരുമാനിച്ചിരിക്കുന്നതായും കേന്ദ്രമന്ത്രി സൂചിപ്പിച്ചു.
പൊതു-സ്വകാര്യ പ്രതിരോധ നിര്മ്മാണത്തെ പ്രോത്സാഹിപ്പിക്കുന്നതാണ് ഇന്ത്യയുടെ നയം. ലോക രാജ്യങ്ങളുമായുള്ള സഹകരണം ഇതിനായി ഇന്ത്യ ഉറപ്പുവരുത്തി രാജ്നാഥ് സിംഗ് ചൂണ്ടിക്കാട്ടി. ജീവന്രക്ഷാ പ്രവര്ത്തനങ്ങളില് ദുരന്തമുഖങ്ങളില് ആദ്യമെത്തുന്ന തരത്തില് പ്രതിരോധ സംവിധാനത്തെ ശക്തിപ്പെടുത്തും. ലോകരാജ്യങ്ങളുമായുള്ള സഹകരണം ഇതിനായി കൂട്ടാന് തീരുമാനിച്ചതായും പ്രതിരോധ എക്സപോയില് മൂന്നാം ദിനത്തിലെ സമ്മേളനത്തില് രാജ്നാഥ് സിംഗ് വ്യക്തമാക്കി.