സിഡ്നി: ഓസ്ട്രേലിയന് ക്രിക്കറ്റിന്റെ ബാറ്റിംഗ് കരുത്തായ ഡേവിഡ് വാര്ണര് ബഹുമതികള് പുറകേ പുറകേ എത്തുന്നതിനെ കാണുന്നത് അതീവ വിനയത്തോടെ. മൂന്നാം തവണയും ഓസ്ട്രേലിയന് ക്രിക്കറ്റ് ഇതിഹാസമായിരുന്ന അലന് ബോര്ഡറുടെ പേരിലുള്ള മെഡലും ക്രിക്കറ്റ് വിദഗ്ധന്മാര് ചേര്ന്ന് തീരുമാനിക്കുന്ന ടി20 പ്ലെയര് ഓഫ് ദ ഇയര് അവാര്ഡും നേടിയതിനോടാണ് വാര്ണര് ഏറെ വിനയത്തോടെ സമൂഹമാധ്യമത്തിലൂടെ പ്രതികരിച്ചത്.
സ്വന്തം കുടുബത്തിനൊപ്പം വീട്ടിലിരിക്കുന്ന ചിത്രത്തോടൊപ്പമാണ് ഇന്സറ്റാഗ്രാമില് ബഹുമതി കിട്ടിയതിനോട് വാര്ണര് പ്രതികരിച്ചത്. ‘ എവിടെനിന്നാണ് ഞാന് തുടങ്ങേണ്ടത്. മൂന്നാം തവണയും അലന്ബോര്ഡര് മെഡലും ടി20 പ്ലെയര് ഓഫ് ദ ഇയറും ലഭിച്ചിരിക്കുന്നതില് ഏറെ ബഹുമാനിക്കപ്പെട്ടിരിക്കുന്നു. സന്തോഷം കൊണ്ട് എനിക്ക് ആവേശം അടക്കാനാകുന്നില്ല. നിരവധി ഉയര്ച്ചതാഴ്ചകളുടെ ജീവിതമായിരുന്നു എന്റേത്. എന്നാല് എല്ലാ ദുര്ഘടങ്ങളും മറികടക്കാനായത് എന്റെ കുടുംബം കൂടെനിന്നതുകൊണ്ടാണ്. എന്റെ ഭാര്യയുടെ സഹനശക്തിയും മനോധൈര്യവുമാണ് എനിക്ക് ശക്തിനല്കിയത്. ഞങ്ങളൊറ്റക്കെട്ടായി എല്ലാം സഹിച്ചു, നേരിട്ടു. എന്റെ മൂന്ന് സുന്ദരികളായ പെണ്കുഞ്ഞുങ്ങളെ പൊന്നുപോലെ നോക്കുന്ന നല്ലൊരച്ഛനായി മാതൃകയായി മാറാനാഗ്രഹിക്കുന്നു. ഐ ലവ് യൂ’ ഇന്സ്ററാഗ്രാമിലൂടെ ഭാര്യ കാന്ഡിക്കും മക്കള്ക്കുമായി വാര്ണര് തന്റെ ഹൃദയം തുറക്കുകയായിരുന്നു.
2016ലും17ലും വാര്ണറെ തേടി അലന്ബോര്ഡര് ബഹുമതി എത്തിയിരുന്നു. 2018ല് പന്തുചുരണ്ടല് വിവാദത്തിലാണ് വാര്ണറേയും സ്റ്റീവ് സ്മിത്തിനേയും ക്രിക്കറ്റ് ഓസ്ട്രേലിയ പുറത്താക്കിയത്. എന്നാല് 2019ലെ ലോകകപ്പ് ക്രിക്കറ്റില് വാര്ണറുടെ തിരിച്ചുവരവ് കൊടുങ്കാറ്റിന് സമമായിരുന്നു. ഏറ്റവും അധികം റണ്സ് അടിച്ചുകൂട്ടിയവരിലൊരാളായി. തുടര്ന്ന് ആഷസ്സില് നിറം മങ്ങിയെങ്കിലും പാകിസ്താനെതിരെ 335 റണ്സ് നേടി ക്രിക്കറ്റ് ലോകത്തെ ഞെട്ടിച്ചു.
