ഓക്ലാന്റ്: ന്യൂസിലാന്റ് മണ്ണില് ടി20യില് ഇന്ത്യനടത്തിയ വൈറ്റ് വാഷിന് ഏകദിനത്തില് അതേ നാണയത്തില് കിവികളുടെ മറുപടി. പരമ്പരയിലെ മൂന്നാമത്തേതും അവസാനത്തേതുമായ മത്സരത്തില് 5 വിക്കറ്റിനാണ് ആതിഥേയര് അനായാസ ജയം നേടിയത്. ഇന്ത്യയുടെ മോശമല്ലാത്ത 7ന് 296 എന്ന സ്ക്കോര് ന്യൂസിലാന്റ് 47.1 ഓവറില് 5 വിക്കറ്റ് നഷ്ടത്തില് 300 എടുത്ത് മറികടന്നു.
ഓപ്പണര്മാരായ ഗുപ്റ്റിലും(66) നിക്കോള്സും(80) നേടിയ സെഞ്ച്വറി കൂട്ടുകെട്ടാണ്(106) വിജയത്തിന് അടിത്തറ പാകിയത്. റോസ്ടെയ്ലറടക്കം മധ്യനിര തകര്ന്നിട്ടും ഗ്രാന്റ് ഹോമിന്റെ 28 പന്തിലെ 58 റണ്സ് കിവികളെ ജയിപ്പിച്ചു. 6 ബൗണ്ടറികളും 3 സിക്സറുകളുമടങ്ങിയതായിരുന്നു ഗ്രാന്റ്ഹോമിന്റെ തകര്പ്പന് ബാറ്റിംഗ്.
പരിക്കില് നിന്ന് മുക്തനായി കളിക്കാനിറങ്ങിയ വില്യംസണ്(22) ആദ്യ രണ്ടുകളികളിലേയും താരം റോസ് ടെയ്ലര്(12) ലതാം(32) നീഷം(19) എന്നിവരെ കൃത്യമായ ഇടവേളകളില് പറഞ്ഞയച്ചിട്ടും ഇന്ത്യയെ ജയം കൈവിട്ടു. ഇന്ത്യക്കായി 3 വിക്കറ്റുകള് വീഴ്ത്തിയ ചാഹല് മാത്രമാണ് തിളങ്ങിയത്.
ആദ്യം ബാറ്റ്ചെയ്ത ഇന്ത്യ ലോകേഷ് രാഹുലിന്റെ മികച്ച സെഞ്ച്വറി(112)യുടേയും ശ്രേയസ്സ് അയ്യരുടെ (62) റണ്സിന്റേയും പൃഥ്വി ഷാ(40), മനീഷ് പാണ്ഡെ(42) എന്നിവരുടെ മികവിലാണ് സക്കോര് 296ന്7 എന്ന നിലയിലെത്തിച്ചത്. ഹാമിഷ് ബെന്നറ്റാണ് 4 വിക്കറ്റുകള് വീഴ്ത്തി ഇന്ത്യയെ തടഞ്ഞത്.
