ദുബായ്: ഉടനാരംഭിക്കുന്ന വനിതാ ടി20 ലോകകപ്പില്‍ നോ ബോള്‍ നിയമം നടപ്പാക്കാനൊരുങ്ങി ഐസിസി. ഇനി മുതല്‍ നോ ബോള്‍ തീരുമാനിക്കുക മൂന്നാം അമ്പയറായിരിക്കുമെന്നതാണ് പുതിയ നിയമമെന്നും ഐസിസി വ്യക്തമാക്കി. ഓഫ് ഫീല്‍ഡില്‍ സാങ്കേതിക വിദ്യയിലൂടെ മാത്രം നോ ബോള്‍ തീരുമാനം എടുത്താല്‍ മതിയെന്നാണ് ഐസിസി നയം.
ബൗളര്‍ പന്തെറിയുന്ന മുറക്ക് മുന്‍കാല്‍ ക്രീസിന് പുറത്തേക്ക് വരുന്നതിന്റെ സാങ്കേതികപ്രശ്‌നം വര്‍ഷങ്ങളായി തലവേദനയായിരുന്നു. വരയില്‍ ഉപ്പൂറ്റി വരുന്നതാണോ പുറത്തു പോകുന്നതാണോ എന്നത് ഗ്രൗണ്ട് അമ്പയര്‍മാര്‍ക്ക് പലപ്പോഴും പിഴവ് വരുന്നതിനാലാണ് ചര്‍ച്ച നടന്നത്. തുടര്‍ന്ന് ഇന്ത്യയിലും വിന്‍ഡീസിലും കഴിഞ്ഞ പരമ്പരകളില്‍ സാങ്കേതിക വിദ്യയിലൂടെ ഫ്രണ്ട് ഫൂട്ട് സാങ്കേതിക വിദ്യ പരീക്ഷിച്ചിരുന്നു. എന്നാല്‍ ഒരു സുപ്രധാന ടൂര്‍ണ്ണമെന്റില്‍ സാങ്കേതിക വിദ്യ ഉപയോഗിക്കാന്‍ പോകുന്നത് ആദ്യം. ഓസ്‌ട്രേലിയയില്‍ ഈ മാസം 21 മുതല്‍ മാര്‍ച്ച് 8 വരെയാണ് വനിതാ ടി20 ലോകകപ്പ് നടക്കുക.
നോ ബോള്‍ പരീക്ഷണത്തില്‍ ഓരോ പന്തിന് ശേഷവും വീഡിയോ നിരീക്ഷിക്കുന്ന തരത്തിലാണ് സംവിധാനം ഒരുക്കുന്നത്. ഉടന്‍ ഫീല്‍ഡ് അംപയറിലേക്ക് മൂന്നാം അമ്പയറുടെ നിര്‍ദ്ദേശം വരും.12 മത്സരങ്ങളില്‍ നിലവില്‍ നോ ബോള്‍ നിയമത്തിന്റെ പരീക്ഷണം നടത്തിയതായി ഐസിസി അറിയിച്ചു.
