സിഡ്‌നി: ഓസ്‌ട്രേലിയന്‍ മണ്ണില്‍ വനിതകളുടെ ടി20 ലോകകപ്പ് ഇന്നാരംഭിക്കും. ഉദ്ഘാടന മത്സരത്തില്‍ ആതിഥേയരും നിലവിലെ ചാമ്പ്യന്മാരുമായ ഓസ്‌ട്രേലിയ ഇന്ത്യയെ നേരിടും. ഇന്ത്യന്‍ സമയം ഉച്ചക്ക് 1.30ന് മത്സരം ആരംഭിക്കും.
ടി20 ലോകകപ്പില്‍ ഇന്ത്യ ഇതുവരെ സെമിക്കപ്പുറം പോയിട്ടില്ല. 2009,10,18 വര്‍ഷങ്ങളിലാണ് ഇന്ത്യന്‍ വനിതകള്‍ സെമിഫൈനലിലെത്തിയത്. ബാറ്റിംഗിലെ സ്ഥിരതക്കുറവാണ് ഇന്ത്യയെ സുപ്രധാന മത്സരങ്ങളില്‍ തോല്‍പ്പിക്കുന്ന ഘടകം. ഇതുവരെ ലോകകപ്പില്‍ കളിച്ചവയില്‍ 10 ജയം 10 തോല്‍വി എന്ന നിലയിലാണ് ഇന്ത്യയുടെ ജയപരാജയ കണക്കുകള്‍. തൊട്ടടുത്ത് കഴിഞ്ഞ ത്രിരാഷ്‌ട്രപരമ്പരയിലും ഫൈനലില്‍ ഓസ്‌ട്രേലിയയോട് പരാജയപ്പെട്ടതും ബാറ്റിംഗ് തകര്‍ച്ചമൂലമായിരുന്നു.
ക്യാപ്റ്റന്‍ ഹര്‍മന്‍പ്രീതും സ്മൃതി മന്ഥാനയുമാണ് ഇന്ത്യയുടെ ശക്തരായ ബാറ്റിംഗ് താരങ്ങള്‍. സ്മൃതി-ഷഫാലി ഓപ്പണിംഗ് കൂട്ടുകെട്ട് മികച്ച സ്‌കോര്‍ കണ്ടെത്തുമെന്നാണ് പ്രതീക്ഷ. ബൗളിംഗില്‍ സ്പിന്‍ കരുത്തിലാണ് ഇന്ത്യ മുന്നേറുന്നത്.
