ന്യൂഡല്ഹി: ഓരോ കളികളിലും വ്യത്യസ്ത താരങ്ങളെ ഇറക്കുന്ന രീതിക്കെതിരെ രൂക്ഷ വിമര്ശനവുമായി മുന് നായകന് കപില് ദേവ് രംഗത്ത്. വെല്ലിംഗ്ടണ് ടെസ്റ്റിലെ ഇന്ത്യക്കേറ്റ കനത്ത തോല്വിയോട് പ്രതികരിക്കുകയായിരുന്നു മുന് ഓള്റൗണ്ടര്.
ഇന്ത്യന് ക്രിക്കറ്റ് മാനേജ്മെന്റിനെതിരെ രൂക്ഷവിമര്ശനമാണ് കപില് നടത്തിയത്. നിരന്തരം ഇങ്ങനെ താരങ്ങളെ മാറ്റി പരീക്ഷിക്കുന്നത് നിര്ത്തണം.ഓരോ കളിയിലും ഓരോ കളിക്കാരാണ്. പകുതിയിലേറെ കളിക്കാരെ ഒന്നടങ്കം മാറ്റുന്നു. ആരുടേയും സ്ഥാനം സ്ഥിരമല്ല. ആരുടെ സ്ഥാനവും സുരക്ഷിതമല്ല. ഇത് താരങ്ങളേയും ടീമിനേയും ശരിക്കും ബാധിക്കും’ കപില് കുറ്റപ്പെടുത്തി.
രണ്ട് ഇന്നിംഗ്സിലുമായി 200 റണ്സ് നേടാനാകാത്ത ബാറ്റിംഗ് നിരയെന്നത് ഏറെ ശ്രദ്ധിക്കേണ്ടതാണെന്നും കപില് ചൂണ്ടിക്കാട്ടി. ന്യൂസിലാന്റിന്റെ മികച്ച പ്രകടനത്തെ കപില് പ്രശംസിച്ചു.
