ക്രൈസ്റ്റ്ചര്‍ച്ച്: ടീം ഇന്ത്യക്ക് വീണ്ടും തോല്‍വി.7 വിക്കറ്റിനാണ് ന്യൂസിലാന്റ് പര്യടനത്തിലെ രണ്ടാം ടെസ്റ്റിലും അതിദയനീയമായ പരാജയം വിരാടും കൂട്ടരും ഏറ്റുവാങ്ങിയത്. രണ്ടാം ഇന്നിംഗ്‌സില്‍ വെറും 124റണ്‍സിന് പുറത്തായ ഇന്ത്യക്കെതിരെ വിജയലക്ഷ്യമായ 132 റണ്‍സ് കിവീസ് 30 ഓവറുകളില്‍ 3 വിക്കറ്റുകള്‍ മാത്രം നഷ്ടപ്പെടുത്തി മറികടന്നു.ഇതോടെ രണ്ട് ടെസ്റ്റുകളടങ്ങിയ പരമ്പരയും ന്യൂസിലാന്‍ഡിന് സ്വന്തമായി. തുടര്‍ച്ചയായി രണ്ടാം ഇന്നിംഗ്‌സിലും അര്‍ദ്ധ സെഞ്ച്വറികള്‍ നേടിയ ലതാം(52), ബ്ലന്‍ഡല്‍(55) , കെയിന്‍ വില്യംസണ്‍(8) എന്നിവരാണ് പുറത്തായത്. ഗ്രാന്‍ഡോം(5), വാഗ്‌നര്‍(8) എന്നിവരാണ് പുറത്താകാതെ ക്രീസിലുണ്ടായിരുന്നത്. ബുംറ രണ്ടും ഉമേഷ് യാദവ് ഒരു വിക്കറ്റും വീഴ്‌ത്തി. സ്‌ക്കോര്‍ ഇന്ത്യ: 242,124. ന്യൂസിലാന്റ് : 235, 3ന് 132
ആദ്യ ഇന്നിംഗ്‌സില്‍ ഇരുടീമുകലും 250 റണ്‍സുകള്‍ക്ക് താഴെ സ്‌ക്കോറില്‍ വീണതിന് ശേഷം രണ്ടാം ഇന്നിംഗ്‌സിലെ ഇന്ത്യയുടെ പതനം നാട്ടിന്‍പുറത്തെ കളികളേക്കാള്‍ കഷ്ടമായിരുന്നു. ആകെ നാല് പേര്‍ മാത്രമാണ് രണ്ടക്കം കടന്നത്. അതില്‍ 24 റണ്‍സ് നേടിയ ചേതേശ്വര്‍ പൂജാരയുടേതാണ് ഏറ്റവും ഭേദപ്പെട്ട സ്‌ക്കോര്‍. നായകന്‍ വിരാട് കോഹ് ലിയുടെ ബാറ്റിംഗ് ഫോം തകര്‍ച്ച വീണ്ടും തുടരുകയാണ്. 30 പന്ത് നേരിട്ട് 14 റണ്‍സിലാണ് കോഹ്ലിയുടെ തുടര്‍ച്ചയായ 22-ാം ഇന്നിംഗ്‌സുകളിലേയും ദയനീയ പ്രകടനം.
ആദ്യ ഇന്നിംഗ്‌സില്‍ അര്‍ദ്ധ സെഞ്ച്വറി നേടിയ പൃഥ്വിഷാ(14) ഓപ്പണര്‍ മായങ്ക് അഗര്‍വാള്‍(3), അജിന്‍ക്യാ രഹാനെ(9) ഹനുമാവിഹാരി(9), ഋഷഭ് പന്ത്(4), രവീന്ദ്ര ജഡേജ( പുറത്താകാതെ 16), മുഹമ്മദ് ഷമി(5), ബൂംറ(4) എന്ന നിലയിലാണ് ഇന്ത്യന്‍ താരങ്ങളുടെ ദയനീയ പ്രകടനം. ന്യൂസിലാന്റ് ബൗളിംഗില്‍ ഓരോ കളികളിലും മാറി മാറി വിക്കറ്റു കൊയ്യുന്ന ബൗളര്‍മാരില്‍ ഇന്നത്തെ ഊഴം ട്രന്‍ഡ് ബോള്‍ട്ടിന്റേതായിരുന്നു. 14 ഓവറില്‍ വെറും 28 റണ്‍സിനാണ് ബോള്‍ട്ട് 4 വിക്കറ്റുകള്‍ വീഴ്‌ത്തി ഇന്ത്യന്‍ നിരയെ കശക്കിഎറിഞ്ഞത്. ഉജ്ജ്വല ഫോമിലുള്ള സൗത്തി 11 ഓവറില്‍ 36 റണ്‍സിന് 3 വിക്കറ്റും കൊയ്തു. ആദ്യ ഇന്നിംഗ്‌സില്‍ 5 വിക്കറ്റുകള്‍ പിഴുത ജാമിസണിന് വിക്കറ്റൊന്നും കിട്ടിയില്ല.
