ബംഗളൂരു: ബംഗളൂരു രാജ്യാന്തര ഫിലിം ഫെസ്റ്റിവലിൽ മലയാളിയായ സജിൻ ബാബു സംവിധാനം ചെയ്ത ബിരിയാണിയ്ക്ക് പുരസ്കാരം. ജൂറി അവാർഡാണ് ബിരിയാണിയ്ക്ക് ലഭിച്ചത്.ആസാമീസ് സംവിധായിക മഞ്ചു ബോറ, ആകാശ് ആദിത്യ ലാമ, സുബോധ് ശർമ്മ, മാരുതി ജാതിയവർ, ആശിശ് ഡുബേ എന്നിവർ അംഗങ്ങളായ ജൂറിയാണ് അവാർഡ് നിർണ്ണയിച്ചത്.
രണ്ട് ലക്ഷം രൂപയും, ഫലകവുമടങ്ങുന്ന പുരസ്കാരം കർണാടക ഗവർണർ വാജു ഭായി വാലയിൽ നിന്ന് സജിൻ ഏറ്റുവാങ്ങി. ഇത് ബിരിയാണിയ്ക്ക് ലഭിക്കുന്ന രണ്ടാമത്തെ അവാർഡാണ്. റോമിലെ ഏഷ്യാറ്റിക്ക ഫിലിം ഫെസ്റ്റിവലിലെ മികച്ച സിനിമക്കുള്ള നെറ്റ് പാക്ക് അവാർഡും ചിത്രം സ്വന്തമാക്കിയിരുന്നു.
യു.എ.എൻ ഫിലിം ഹൗസിന്റെ ബാനറിൽ നിർമ്മിച്ചിരിക്കുന്ന ചിത്രത്തിൻെറ രചനയും, സംവിധാനവും നിവഹിച്ചിരിക്കുന്നത് സജിൻ ബാബു തന്നെയാണ്.കാർത്തിക് മുത്തുകുമാർ ക്യാമറ ചെയ്തപ്പോൾ എഡിറ്റിംഗ് അപ്പു ഭട്ടതിരിയും മ്യൂസിക് ലിയോ ടോമും ആർട്ട് നിതീഷ് ചന്ദ്ര ആചാര്യയുമാണ് നിർവഹിച്ചത്.
കടൽ തീരത്ത് താമസിക്കുന്ന കദീജയുടേയും, ഉമ്മയുടേയും ജീവിതത്തിൽ അപ്രതീക്ഷിതമായി ഉണ്ടാകുന്ന സംഭവങ്ങൾ കാരണം നാട് വിടേണ്ടി വരികയും, അതിന് ശേഷമുള്ള അവരുടെ യാത്രയുമാണ് ചിത്രത്തിന്റെ പ്രമേയം. കദീജയായി കനി കുസൃതിയും, ഉമ്മയായി ശൈലജ ജലയുമാണ് അഭിനയിക്കുന്നത്. സുർജിത് ഗോപിനാഥ്, അനിൽ നെടുമങ്ങാട്, ശ്യാം റെജി, തോന്നക്കൽ ജയചന്ദ്രൻ തുടങ്ങിയവർ പ്രധാന കഥാപാത്രങ്ങളായി എത്തുന്നുണ്ട്.
വിവിധ ഭാഷകളിൽ നിന്നുള്ള 13 ചിത്രങ്ങളാണ് മത്സരത്തിനുണ്ടായിരുന്നത്. ഏഷ്യൻ സിനിമാ വിഭാഗത്തിൽ തായ് ചലച്ചിത്രം ‘ഹാപ്പി ഓൾഡ് ഇയേഴ്സ്’ മികച്ച ചിത്രമായി തിരഞ്ഞെടുക്കപ്പെട്ടു. മഹേഷ് വാമൻ മഞ്ജരേക്കർ സംവിധാനംചെയ്ത മറാഠി ചിത്രം ’പങ്ക്റൺ’ ആണ് ഇന്ത്യൻ സിനിമാവിഭാഗത്തിലെ മികച്ച ചിത്രം.