ന്യൂഡല്ഹി: ദക്ഷിണാഫ്രിക്കക്കെതിരെ നടക്കാനിരിക്കുന്ന ഏകദിന പരമ്പരയില് കോഹ്ലി തിളങ്ങിയാല് തകരുന്നത് സച്ചിന്റെ മുന്കാല റെക്കോഡ്. ഏറ്റവും വേഗത്തില് 12000 റണ്സ് ഏകദിന ക്രിക്കറ്റില് നേടുന്ന താരമെന്ന റെക്കോഡാണ് പഴങ്കഥയാവുക. വരുന്ന 12-ാം തീയതി ധര്മശാലയിലാണ് മത്സരം ആരംഭിക്കുന്നത്.
സച്ചിന് 300 കളികളിലായാണ് 12000 റണ്സ് തികച്ചതെങ്കില് റണ്മെഷീനായി അറിയപ്പെടുന്ന കോഹ്ലി നിലവില് 239 ഏകദിനങ്ങളില് നിന്നുമാത്രമായി 11867 റണ്സ് അടിച്ചു കൂട്ടിക്കഴിഞ്ഞു. ഇനി വേണ്ടത് 133 റണ്സ് മാത്രം. കഴിഞ്ഞ പരമ്പരയിലെ മോശം പ്രകടനത്തില് നിന്ന് പുറത്തുകടക്കാന് കോഹ് ലി പരിശ്രമിച്ചാല് അത് ടീം ഇന്ത്യക്കും വലിയൊരു ആശ്വാസമാകും. കിവീസിനെതിരെ 11 കളികളിലായി ആകെ 218റണ്സ് മാത്രമാണ് ഇന്ത്യന് നായകന് നേടാനായത്. ന്യൂസിലാന്റില് വച്ച് ടി20 പരമ്പര നേടിയെങ്കിലും ഏകദിനവും ടെസ്റ്റും അടിയറ വെച്ചതില് കോഹ്ലിയുടെ നിരാശാജനകമായ ബാറ്റിംഗ് ഒരു പ്രധാന കാരണവുമായി.
ഏകദിനങ്ങളിലെ റണ് വേട്ടക്കാരില് നിലവില് സച്ചിന് പിന്നില് 314 ഏകദിനങ്ങളിലായി 12000 തികച്ചത് മുന് ഓസ്ട്രേലിയന് നായകന് റിക്കി പോണ്ടിംഗാണ്. തൊട്ടുതാഴെയായി മൂന്നുതാരങ്ങളുള്ളവരെല്ലാം വിരമിച്ചു കഴിഞ്ഞ ശ്രീലങ്കയുടെ മുന് ബാറ്റിംഗ് കരുത്തന്മാരാണ്. കുമാര് സംഗക്കാര(336), സനത് ജയസൂര്യ(379), മഹേല ജയവര്ധനെ(399) എന്നിവരാണവര്.
