കൊച്ചി: തപസ്യ കലാസാഹിത്യ വേദിയുടെ സംസ്ഥാന അധ്യക്ഷനായി സാഹിത്യകാരൻ വിജയകൃഷ്ണനെയും ജനറൽ സെക്രട്ടറിയായി മാധ്യമ പ്രവർത്തകനും എഴുത്തുകാരനുമായ എം. സതീശനെയും തെരഞ്ഞെടുത്തു. എറണാകുളത്ത് നടന്ന സംഘടനയുടെ സംസ്ഥാന വർഷാന്ത പൊതുസഭയിലാണ് പുതിയ ഭാരവാഹികളെ തിരഞ്ഞെടുത്തത്.
സംസ്കാർ ഭാരതി ദേശീയ സമിതി അംഗം ശ്രീപദി പൊതുസഭ ഉദ്ഘാടനം ചെയ്തു. സംസ്ഥാന വർക്കിങ് പ്രസിഡന്റ് പ്രൊഫ. പി.ജി. ഹരിദാസ് അധ്യക്ഷത വഹിച്ചു. ജനറൽ സെക്രട്ടറി കെ.ടി. രാമചന്ദ്രൻ പ്രവർത്തന റിപ്പോർട്ടും ട്രഷറർ കെ. സച്ചിദാനന്ദൻ വരവ്-ചെലവ് കണക്കും അവതരിപ്പിച്ചു.
സംഘടനയുടെ വർക്കിങ് പ്രസിഡന്റായി പ്രൊഫ. പി.ജി. ഹരിദാസ് തുടരും. സംഘടനാ സെക്രട്ടറിയായി സി. രജിത് കുമാറിനെയും ഖജാൻജിയായി കെ. സച്ചിദാനന്ദനെയും തെരഞ്ഞെടുത്തു. കെ.ടി. രാമചന്ദ്രൻ, അനൂപ് കുന്നത്ത്, സി.സി. സുരേഷ്, ജി.എം. മഹേഷ് എന്നിവർ ജോയിന്റ് ജനറൽ സെക്രട്ടറിമാരാണ്.
പരിപാടിയിൽ ആർ.എസ്.എസ് ദക്ഷിണ കേരളം പ്രാന്ത പ്രചാരക് എസ്. സുദർശൻ, ഉത്തര കേരളം പ്രാന്ത ബൗദ്ധിക് പ്രമുഖ് എം. ബാലകൃഷ്ണൻ, തപസ്യ ഓർഗനൈസിങ് സെക്രട്ടറി സി. രജിത് കുമാർ, എം. ശ്രീഹർഷൻ തുടങ്ങിയവർ സംസാരിച്ചു. മുരളി പാറപ്പുറം, യു.പി. സന്തോഷ് എന്നിവർ പ്രമേയങ്ങൾ അവതരിപ്പിച്ചു.
പുതിയ സംസ്ഥാന അധ്യക്ഷനായി തിരഞ്ഞെടുക്കപ്പെട്ട വിജയകൃഷ്ണനെ പ്രൊഫ. പി.ജി. ഹരിദാസ് പൊന്നാട അണിയിച്ച് ആദരിച്ചു.
