ലഖ്നൗ: കൊറോണ ബാധ ചിക്കന് വിപണിയെ ബാധിച്ചുതുടങ്ങി. ഇതിനൊപ്പം പക്ഷിപ്പനി ബാധ കോഴിവളര്ത്തല് കേന്ദ്രങ്ങളെയും സാരമായി ബാധിച്ചിരിക്കുകയാണ്. ചിക്കന് പകരം നമ്മുടെ ചക്കയാണ് താരമായിരിക്കുന്നത്. മത്സ്യമാംസ വിപണിയില് ചിക്കന് വാങ്ങാന് ആളില്ലാത്ത അവസ്ഥയാണെങ്കിലും ഇതിന് പകരമായി ചക്കക്ക് വന് ഡിമാന്റ് കൂടുന്നതായി ഉത്തരേന്ത്യന് വിപണി റിപ്പോര്ട്ട്. കൊറോണ മാംസാഹാരത്തെ സ്വാധീനിക്കുമെന്ന ഭീതിയിലാണ് പലരും പച്ചക്കറിമാത്രം വാങ്ങുന്നത്. അതില് ചക്കകണ്ടാല് ഉടന് വാങ്ങിക്കുന്നതാണ് വിപണിയില് ഡിമാന്റ് കൂട്ടിയത്. ഒരു കിലോക്ക് വെറും 50 രൂപ എന്ന നിലയില് നിന്ന് 120 ലേക്കാണ് വില കുതിച്ചത്.
ചിക്കന് വില 80 രൂപയിലേക്ക് താണിട്ടും വാങ്ങാനാളില്ലാത്ത അവസ്ഥയാണ്. ചക്കവിഭവങ്ങള് നിലവില് ഉത്തരേന്ത്യയില് ഏറെ ജനപ്രീയമാണ്. അതില് ചക്കബിരിയാണി വിപണിയില് വന്ഹിറ്റാണെന്നാണ് റിപ്പോര്ട്ട്. എന്നാല് ചക്ക കിട്ടാനില്ല എന്നതാണ് കേരളത്തിന് പുറത്തെ അവസ്ഥ.
ചിക്കന് വിപണി തിരിച്ചുപിടിക്കാനായി ഗോരഖ്പൂരില് ചിക്കന്മേള നടത്തി പോള്ട്രീ ഫാം അസോസിയേഷന് ശ്രമം നടത്തിയെങ്കിലും ഗുണം കണ്ടിട്ടില്ല. ഒരു പ്ലേറ്റ് ചിക്കന് 30 രൂപ വരെ വിലകുറച്ചിട്ടും ആളുകള്ക്ക് വാങ്ങാന് മടിയാണെന്നാണ് അസോസിയേഷന് ഭാരവാഹികള് പറയുന്നത്.