ഇസ്ലാമാബാദ്: ഒത്തുകളി ആരോപണം നേരിടുന്ന പാക് ക്രിക്കറ്റ് താരം ഉമര്‍ അക്മലിന് ആജീവനാന്ത വിലക്ക് വന്നേക്കും. ചട്ടം ലംഘിച്ചെന്ന് കണ്ടെത്തിയതിനെ തുടര്‍ന്ന് പാക് ക്രിക്കറ്റ് ബോര്‍ഡിന്റെ അഴിമതി വിരുദ്ധ യൂണിറ്റ് ഉമര്‍ അക്മലിനെ സസ്‌പെന്‍ഡ് ചെയ്തിരുന്നു. ഒത്തു കളിക്കാനുള്ള വാഗ്ദാം ലഭിച്ച വിവരം അധികാരികളെ അറിയിക്കാതിരുന്നതാണ് ഉമര്‍ അക്മലിന് തിരിച്ചടിയായത്. ഒത്തുകളി ഓഫര്‍ വന്നാല്‍ ടീം മാനേജരെ അറിയിച്ചിരിക്കണമെന്നാണ് ചട്ടം.
കുറ്റം തെളിഞ്ഞാല്‍ ആറ് മാസം മുതല്‍ ആജീവനാന്ത വിലക്ക് വരെയാണ് ശിക്ഷ. ചുമത്തിയ കുറ്റങ്ങളില്‍ മാര്‍ച്ച് 31 വരെ മറുപടി നല്‍കാനുള്ള സമയമാണ് അക്മലിന് അനുവദിച്ചിരിക്കുന്നത്.
കാനഡയില്‍ നടക്കുന്ന ഗ്ലോബല്‍ ട്വന്റി -20യ്‌ക്കിടെ മത്സരങ്ങള്‍ ഒത്തുകളിക്കുമോയെന്ന് അന്വേഷിച്ച് മുന്‍ ടെസ്റ്റ് ക്രിക്കറ്റ് താരമായ മന്‍സൂര്‍ അക്തര്‍ തന്നെ സമീപിച്ചതായി അക്മല്‍ നേരത്തെ വെളിപ്പെടുത്തിയിരുന്നു. ബ്രാംപ്റ്റണിലും ഒണ്ടാറിയോയിലും നടന്ന മത്സരങ്ങളില്‍ ഒത്തുകളിക്കുമോ എന്നാണ് മന്‍സൂര്‍ ചോദിച്ചതെന്നാണ് അക്മല്‍ പറഞ്ഞത്.
