ബാഴ്‌സലോണ: കൊറോണ ബാധിതര്‍ക്ക് പിന്തുണയുമായി ബാഴ്‌സലോണയുടെ അര്‍ജന്റൈന്‍ സൂപ്പര്‍ താരം ലയണല്‍ മെസി. കൊറോണ വൈറസിന്റെ പ്രതിരോധ പ്രവര്‍ത്തനങ്ങള്‍ക്കും മറ്റുമായി 1 മില്യണ്‍ യൂറോ (ഏകദേശം 8.25 കോടി രൂപ)യാണ് സൂപ്പര്‍ താരം സംഭാവന ചെയ്തിരിക്കുന്നത്.
ബാഴ്‌സലോണയിലെ ആശുപത്രി ക്ലിനിക്കിലേക്കും സ്വന്തം രാജ്യമായ അര്‍ജന്റീനയിലെ മെഡിക്കല്‍ സെന്ററിലേക്കുമാണ് മെസി സംഭാവന ചെയ്ത തുക എത്തുക. മെസിയുടെ സംഭവനയെ അഭിനന്ദിച്ചും നന്ദി അറിയിച്ചും ബാഴ്‌സലോണയിലെ ക്ലിനിക്ക് ട്വീറ്റ് ചെയ്തിരുന്നു. മെസിക്കു പിന്നാലെ മുന്‍ ബാഴ്‌സലോണ കോച്ച് പെപ് ഗാര്‍ഡിയോളയും 1 മില്യണ്‍ യൂറോ സംഭാവന ചെയ്തിട്ടുണ്ട്.
എയ്‌ഞ്ചെല്‍ സോളെര്‍ ഡാനിയേല്‍ ഫൗണ്ടേഷന്‍ ആന്‍ഡ് മെഡിക്കല്‍ കോളേജ് നടത്തിയ ക്യാംപെയിനിലേക്കാണ് ഇരുവരും സംഭാവന ചെയ്തിരിക്കുന്നത്. നേരത്തെ, മെസിക്കു പുറമെ പോര്‍ച്ചുഗല്‍ ഇതിഹാസ ഫുട്‌ബോള്‍ താരം ക്രിസ്റ്റിയാനോ റൊണാള്‍ഡോയും ഏജന്റും മൂന്ന് ഐസിയു യൂണിറ്റുകള്‍ക്ക് ആവശ്യമായ സംഭാവനകള്‍ ചെയ്ത് രംഗത്തുവന്നിരുന്നു.
