ന്യൂഡൽഹി: കൊറോണ വൈറസിന് എതിരായ പ്രതിരോധ പ്രവർത്തനങ്ങളിൽ അണിചേർന്ന് ഇന്ത്യൻ ഒളിംപിക് അസോസിയേഷനും. ഇതിന്റെ ഭാഗമായി പ്രധാനമന്ത്രിയുടെ ദുരിതാശ്വാസ നിധിയിലേക്ക് 71,14,002 ലക്ഷം രൂപ സംഭാവന ചെയ്തു. പ്രതിരോധ പ്രവർത്തനങ്ങൾക്കായി മുന്നോട്ട് വന്ന എല്ലാ കായിക സംഘടനകൾക്കും ഐഒഎ അഭിനന്ദനമറിയിച്ചു.
‘ഒരിക്കൽ കൂടി രാജ്യത്തിന് സഹകരണം ആവശ്യമായ സമയത്ത് ഒളിമ്പിക് കുടുംബം മുന്നോട്ട് വന്നിരിക്കുകയാണ്. കായിക മത്സരങ്ങളിലൂടെ എന്നും ഞങ്ങൾ രാജ്യത്തിന്റെ അഭിമാനം ഉയർത്തിയിട്ടേ ഉള്ളൂ. ഒളിമ്പിക് അസോസിയേഷൻ പ്രസ്താവനയിലൂടെ അറിയിച്ചു. ‘ഈ സാഹചര്യത്തിൽ രാജ്യത്തിനു വേണ്ടി സംഭാവന നൽകിയ ഒളിമ്പിക് അസോസിയേഷനിൽ അംഗങ്ങളായ എല്ലാ ദേശീയ സ്പോർട്സ് ഫെഡറേഷനുകൾക്കും സംസ്ഥാന ഒളിമ്പിക് അസോസിയേഷനുകൾക്കും നന്ദി പറയുന്നു’. ഐഒഎ ട്വിറ്ററിൽ കുറിച്ചു.
കൊറോണയെ പ്രതിരോധിക്കാൻ കായിക ലോകത്തു നിന്നും വലിയ രീതിയിലുള്ള സഹകരണമാണ് ഉണ്ടാകുന്നത്. ഇന്ത്യൻ ഒളിമ്പിക് അസോസിയേഷനു പുറമെ ഹോക്കി ഇന്ത്യ(25 ലക്ഷം), ബിസിസിഐ(51 കോടി), ഇന്ത്യൻ ഫുട്ബോൾ ടീം എന്നിവരും സംഭാവന നൽകിയിരുന്നു. സംഘടനകൾക്ക് പുറമെ കായിക താരങ്ങളിൽ നിന്നും മികച്ച സഹകരണമാണ് ഉണ്ടായിക്കൊണ്ടിരിക്കുന്നത്.
