തിരുവനന്തപുരം: സംസ്ഥാനത്ത് കൊറോണ വൈറസ് വ്യാപിക്കുന്നതിനിടെ ബോധവത്കരണ വീഡിയോയുമായി തലസ്ഥാനത്തെ ഒരു കൂട്ടം യുവാക്കൾ. രോഗ പ്രതിരോധത്തിന്റെ ഭാഗമായി ബോധവത്കരണം നൽകിയുള്ള വീഡിയോ ഇതിനോടകം ലക്ഷക്കണക്കിനാളുകളാണ് കണ്ടത്. വീഡിയോ വൈറലായതോടെ ഡിജിപി ലോക്നാഥ് ബെഹ്റ തന്നെ അഭിനന്ദനവുമായെത്തി.
സംസ്ഥാന വ്യാപകമായി കൊറോണ വ്യാപിക്കുന്ന സാഹചര്യത്തിലാണ് വ്യാപനം തടയാൻ ഒരു കൂട്ടം യുവാക്കൾ വീഡിയോ നിർമ്മിച്ചത്. രോഗം പകരുന്ന രീതിയും അത് തടയാൻ സ്വീകരിക്കേണ്ട മാർഗ്ഗ നിർദ്ദേശങ്ങളും വീഡിയോയിലൂടെ പങ്കുവെക്കുന്നുണ്ട്. കൈകൾ ശുചിയാക്കുന്നതും സാനിറ്റൈസർ എങ്ങനെ ഉപയോഗിക്കണമെന്നതെല്ലാം വീഡിയോയിലൂടെ മനസിലാക്കാം.
വീഡിയോ വൈറലായതിനേക്കാൾ ജനങ്ങൾ കാര്യങ്ങൾ മനസിലാക്കാൻ കാണിക്കുന്ന ആർജവത്തെ ഇവർ അനുമോദിക്കുന്നുണ്ട്. സംസ്ഥാന പോലീസ് മേധാവി ലോക്നാഥ് ബെഹ്റയുടെ അഭിനന്ദനവും ഇവർക്ക് ഈർജ്ജം പകരുന്നുണ്ട്. കേരളാ പോലീസിന്റെ ഒഫിഷ്യൽ ഫേസ് ബുക്ക് പേജിലൂടെ നിരവധിപ്പേരിൽ ഈ വീഡിയോ എത്തി.
മിസോറം മുൻ ഗവ൪ണ൪ കുമ്മനം രാജശേഖരൻ, ഒ രാജഗോപാൽ എംഎൽഎ, വി കെ പ്രശാന്ത് എംഎൽഎ തുടങ്ങി നിരവധി പേരാണ് സോഷ്യൽ മീഡിയയിലൂടെ ഈ വീഡിയോ ഷെയർ ചെയ്തത്. നാടിന്റെ നന്മക്കായി പൊതുജനങ്ങളിൽ അവബോധമുണ്ടാക്കാൻ വീഡിയോയ്ക്ക് കഴിഞ്ഞ സന്തോഷത്തിലാണ് അഞ്ചംഗ അണിയറപ്രവർത്തകർ.