കോവിഡിനെതിരെ പൊരുതാൻ നമ്മുടെ രാജ്യം വികസിപ്പിക്കുന്ന ആരോഗ്യസേതു ആപ്പിനെ പറ്റിയും അതിന്റെ പ്രൈവസി സെറ്റിങ്ങുകളെയും പറ്റി കൂടുതൽ വിശദമാക്കാനാണ് ഈ പോസ്റ്റ്.
കോവിഡ് വ്യാപനം തടയുവാനും പൗരന്മാരുടെ സഞ്ചാരം തടസങ്ങളില്ലാതെ നടക്കുവാനും കേന്ദ്ര ഗവണ്മെന്റ് ഡെവലപ്പ് ചെയ്ത മൊബൈൽ ആപ്ലിക്കേഷനാണ് ആരോഗ്യസേതു. നമ്മുടെ കോവിഡ് രോഗസാധ്യത അറിയുക, ഏറെ താമസിയാതെ യാത്ര പാസായും ഇത് ഉപയൊഗിക്കുക ഇതൊക്കെയാണ് ഇതിന്റെ ഉപയൊഗങ്ങൾ.
നമ്മുടെ തൊട്ടടുത്ത് കഴിഞ്ഞ 14 ദിവസത്തിനുള്ളിൽ കോവിഡ് സാധ്യത ഉള്ള അല്ലെങ്കിൽ കൊവിഡ് സ്ഥിതീകരിച്ച ഒരാൾ വന്നിട്ടുണ്ട് എങ്കിൽ ആപ്പ് നമുക്ക് സൂചന തരുന്നതാണ്.
സ്വാഭാവികമായും വരുന്ന ചോദ്യങ്ങൾ ഡാറ്റ സെക്യൂരിറ്റിയെ പറ്റിയാണ്. അതറിയാൻ ഈ ആപ്പിന്റെ പ്രവർത്തനം ലളിതമായി വിശദീകരിക്കാം.
അപ്ലിക്കേഷനിൽ രജിസ്റ്റർ ചെയ്യുമ്പോൾ, പേര്, ഫോൺ നമ്പർ, പ്രായം, ലൈംഗികത, തൊഴിൽ, കഴിഞ്ഞ 30 ദിവസങ്ങളിൽ സന്ദർശിച്ച രാജ്യങ്ങൾ. എന്നീ വിവരങ്ങൾ ശേഖരിക്കുകയും ഇന്ത്യാ ഗവൺമെന്റ് നിയന്ത്രിക്കുന്ന ഒരു സെർവറിൽ സുരക്ഷിതമായി സംഭരിക്കുകയും ചെയ്യുന്നു. ഈ വിവരങ്ങൾ ഒരു യുണീക്‌ ഐഡിയുമായി ബന്ധപ്പെടുത്തുന്നു. ആപ്ലിക്കേഷനുമായി ബന്ധപ്പെട്ട എല്ലാ ഇടപാടുകളിലും ഒരാളെ തിരിച്ചറിയാൻ ഈ ഐഡി പിന്നീട് ഉപയോഗിക്കും.
രജിസ്റ്റർ ചെയ്ത രണ്ട് ഉപയോക്താക്കൾ പരസ്പരം ബ്ലൂടൂത്ത് പരിധിയിൽ വരുമ്പോൾ, അവരുടെ അപ്ലിക്കേഷനുകൾ സ്വയമേവ ഈ ഐഡികൾ കൈമാറ്റം ചെയ്യുകയും കോൺടാക്റ്റ് നടന്ന സമയവും ജിപിഎസ് ലൊക്കേഷനും രേഖപ്പെടുത്തുകയും ചെയ്യും. ഈ വിവരങ്ങൾ ഉപയോക്താവിന്റെ മൊബൈൽ ഉപകരണത്തിൽ സുരക്ഷിതമായി സംഭരിക്കപ്പെടും, മാത്രമല്ല മറ്റ് ഉപയോക്താക്കൾക്ക് ഇത് ആക്‌സസ് ചെയ്യാൻ കഴിയില്ല.
ഈ ഡാറ്റ നിങ്ങൾക്ക് കോവിഡ് സ്ഥിതീകരിക്കുന്ന അല്ലെങ്കിൽ സംശയിക്കുന്ന ഘട്ടം വരെ നിങ്ങളുടെ ഡിവൈസിൽ മാത്രമാവും ശേഖരിക്കപ്പെടുക. നിങ്ങൾക്ക് രോഗമുണ്ട് എന്ന് മനസ്സിലായാൽ നിങ്ങളുടെ കോണ്ടാക്റ്റിൽ വന്ന എല്ലാവരുടെയും ഐഡികൾ ആ രേഖയിൽ നിന്നും സെർവറിലേക്ക് അയക്കുകയും അത് വ്യക്തികളെ അലേർട്ട് ചെയ്യാനും നിങ്ങൾ 14 ദിവസം സഞ്ചരിച്ച സ്ഥലങ്ങൾ ട്രാക്ക് ചെയ്യാനും മറ്റും ഉപയോഗിക്കുകയും ചെയ്യുന്നു.
അതായത് നിങ്ങളുടെ ചുരുക്കം ചില വിവരങ്ങൾ മാത്രമാണ് ശേഖരിക്കുന്നത്. അത് സൂക്ഷിക്കുന്നത് നമ്മുടെ രാജ്യത്തിന്റെ അധീനതയിലുള്ള സുരക്ഷിതമായ സെർവറിലും ആണ്. പരമാവധി ആളുകൾക്ക് ഇത് വിശദീകരിച്ച് കൊടുക്കുക, പരമാവധി ആളുകളെ ആരോഗ്യസേതു ഇൻസ്റ്റാൾ ചെയ്യാൻ പ്രേരിപ്പിക്കു.
