ന്യൂഡല്ഹി: കൊറോണ പ്രതിരോധ പ്രവര്ത്തനങ്ങള്ക്കായി പിഎം കെയേഴസ് ഫണ്ടിലേക്ക് 25 കോടി രൂപ സംഭാവന നല്കിയതിന് പുറമെ കൂടുതല് സഹായ വാഗ്ദാനങ്ങളുമായി ബോളിവുഡ് താരം അക്ഷയ് കുമാര്. മുംബൈയിലെ ഗാലക്സി തിയറ്ററിന് സാമ്പത്തിക സഹായം വാഗ്ദാനം ചെയ്തിരിക്കുകയാണ് അക്ഷയ് കുമാര്. കൊറോണ വൈറസ് വ്യാപനത്തെ തുടര്ന്ന് ബുദ്ധിമുട്ട് അനുഭവിക്കുന്ന ദിവസ വേതന തൊഴിലാളികള്ക്കാണ് അക്ഷയ് കുമാര് സഹായ വാഗ്ദാനം നല്കുന്നത്.
ഗാലക്സി തിയറ്ററിന്റെ മാനേജ്മെന്റുമായി അക്ഷയ് കുമാര് ഫോണില് ബന്ധപ്പെട്ടു. കൊറോണ വൈറസ് വ്യാപനം തടയാനായി ലോക്ക് ഡൗണ് പ്രഖ്യാപിച്ചതോടെ തിയറ്റര് ജീവനക്കാരെല്ലാം പ്രതിസന്ധിയിലാണ്. ജീവനക്കാര്ക്ക് ശമ്പളം നല്കാനോ മറ്റോ സഹായം ആവശ്യമുണ്ടോയെന്ന് അക്ഷയ് കുമാര് ഫോണില് ബന്ധപ്പെട്ട് ചോദിച്ചാതായി ഗാലക്സി തിയറ്റര് ഉടമ മനോജ് ദേശായി ദേശീയ മാദ്ധ്യമങ്ങളോട് വെളിപ്പെടുത്തി.
മാര്ച്ച് മാസത്തിലാണ് അക്ഷയ് കുമാര് പിഎം കെയേഴ്സ് ഫണ്ടിലേക്ക് 25 കോടി രൂപ സംഭാവന നല്കിയത്. ഇത്തരമൊരു പ്രതിസന്ധി സമയത്ത് ആളുകളുടെ ജീവനാണ് വില കല്പ്പിക്കേണ്ടതെന്നും അതിന് തനിക്ക് കഴിയുന്നത് ചെയ്യുകയാണെന്നും അദ്ദേഹം വ്യക്തമാക്കിയിരുന്നു. നിരവധി ആളുകള് താരത്തിന്റെ സത്പ്രവര്ത്തിയെ പ്രശംസിച്ച് രംഗത്തെത്തുകയും ചെയ്തിരുന്നു.
