ന്യൂഡല്ഹി: കൊറോണ വൈറസ് ഏതെല്ലാം തരത്തില് മനുഷ്യനെ ബാധിക്കുന്നുവെന്നത് സംബന്ധിച്ച് ഒട്ടേറെ പഠനങ്ങളാണ് ഇപ്പോള് നടന്നു കൊണ്ടിരിക്കുന്നത്. ഗര്ഭിണികള്, നവജാത ശിശുക്കള്, പ്രയാമായവര് എന്നിവരെയൊക്കെ കൊറോണ എങ്ങനെ ബാധിക്കുമെന്ന തരത്തിലുള്ള പഠനങ്ങള് വിവിധ ഗവേഷകര് നടത്തിയിട്ടുണ്ട്. കുട്ടികളില് വൈറസിന്റെ പ്രവര്ത്തനം എപ്രകാരമായിരിക്കുമെന്നത് സംബന്ധിച്ച പഠന റിപ്പോര്ട്ടാണ് ഇപ്പോള് പുറത്തു വന്നിരിക്കുന്നത്.
കൊറോണ വൈറസ് ബാധിച്ച കുട്ടികളില് താരതമ്യേന കുറഞ്ഞ രോഗലക്ഷണങ്ങള് മാത്രമെ പ്രകടമാകൂവെന്നാണ് പഠനങ്ങള് വ്യക്തമാക്കുന്നത്. കൊറോണ ബാധിച്ച കുട്ടികളില് നേരത്തെ രോഗനിര്ണയം നടത്താനും ഒന്നോ രണ്ടോ ആഴ്ച്ചയ്ക്കുള്ളില് രോഗമുക്തിയിലേക്ക് എത്താനും സാധിക്കുന്നുണ്ടെന്നാണ് പഠനങ്ങള് വ്യക്തമാക്കുന്നത്.
അമേരിക്കന് മെഡിക്കല് അസോസിയേഷന് പ്രസിദ്ധീകരിച്ച ജേണലിലാണ് പഠനം പ്രസിദ്ധീകരിച്ചിരിക്കുന്നത്. 1065 പേരില് വ്യത്യസ്തമായ പഠനങ്ങളെ അടിസ്ഥാനപ്പെടുത്തിയാണ് റിപ്പോര്ട്ട് തയ്യാറാക്കിയിരിക്കുന്നത്. ചൈന, സിങ്കപ്പൂര് തുടങ്ങിയ രാജ്യങ്ങളിലെ 9 വയസുവരെ പ്രായമുള്ള കുട്ടികളെയാണ് പഠനത്തിന് വിധേയമാക്കിയത്.
പൊതുവില് മാതാപിതാക്കളില് നിന്നോ മറ്റു കുടുംബാംഗങ്ങളില് നിന്നോ സമ്പര്ക്കം മൂലമാണ് കുട്ടികള്ക്ക് രോഗം ബാധിച്ചത്. നവജാത ശിശുക്കളില് രോഗബാധയുണ്ടാകുന്നത് പ്രസവ സമയത്തോ തുടര്ന്നുള്ള ദിവസങ്ങളിലോ ആകാമെന്നാണ് ഗവേഷകരുടെ നിഗമനം. ഇത് സ്ഥിരീകരിക്കാന് കൂടുതല് പഠനങ്ങള് ആവശ്യമാണെന്നും ഗവേഷകര് വ്യക്തമാക്കുന്നു.
