ന്യൂഡല്ഹി: തബ് ലീഗ് ജമാ അത്തെ നേതാവ് മൗലാനാ സാദിന്റെ മകനെ ഡല്ഹി ക്രൈംബ്രാഞ്ച് ചോദ്യം ചെയ്തു. നിസാമുദ്ദീന് മര്ക്കസിലെ സമ്മേളനവുമായി ബന്ധപ്പെട്ട വിഷയത്തിലാണ് സാദിന്റെ കുടുംബാംഗങ്ങളില് നിന്നും വിവരങ്ങള് ശേഖരിക്കുന്നതെന്ന് ഡല്ഹി പോലീസ് അറിയിച്ചു. സമ്മേളനവുമായി ബന്ധപ്പെട്ട 20 പേരുടെ വിവരങ്ങള് കിട്ടാനാണ് മകനെ പ്രത്യേകമായി ചോദ്യം ചെയ്തതെന്ന് ക്രൈം ബ്രാഞ്ച് ഉദ്യോഗസ്ഥര് പറഞ്ഞു.
ലോക്ഡൗണ് ലംഘിച്ച് നടന്ന സമ്മേളനത്തില് പങ്കെടുക്കാനെത്തിയ വിദേശ പൗരന്മാര്ക്കൊപ്പം പോലീസ് അന്വേഷിക്കുന്ന ചില പ്രമുഖ വ്യക്തികളും ഉണ്ടായിരുന്നുവെന്നാണ് വിവരം. ഒപ്പം വന് ഹവാല പണമിടപാടും വിദേശ പണ മിടപാടും മര്ക്കസ്സിന്റെ മറവില് നടക്കുന്നതായും കണ്ടെത്തിയിരുന്നു. സ്വയം പോലീസിനോട് ഒന്നും പറയാതിരിക്കുന്ന മൗലാനാ സാദ് എല്ലാ കാര്യങ്ങളും അഭിഭാഷകരെ വച്ച് കൈകാര്യം ചെയ്യുന്നതിനാലാണ് കുടുംബാംഗങ്ങളെ ചോദ്യം ചെയ്യുന്നതിലേക്ക് പോലീസിനെ എത്തിച്ചിരിക്കുന്നത്.
കൊറോണ ബാധയുമായി ബന്ധപ്പെട്ട സര്ക്കാര് നിര്ദ്ദേശങ്ങള് തുടക്കം മുതല് അവഗണിച്ച മൗലാനാ സാദ് പരിശോധനാ ഫലം പോലീസിന് ഇതുവരെ കൈമാറിയിട്ടില്ല. സര്ക്കാര് സംവിധാനത്തിലൂടെ പരിശോധന നടത്താന് ഏപ്രില് 27ന് നല്കിയ നോട്ടീസ് പ്രകാരം നല്കിയത് ഒരു സ്വകാര്യ ലാബിലെ ഫലമാണെന്നും പോലീസ് കണ്ടെത്തി. അതില് ഫലം നെഗറ്റീവാണ്. പോലീസ് ഇത് വിശ്വസിക്കുന്നില്ല. തുടര്ന്ന് 30-ാം തീയതിയും നോട്ടീസ് നല്കിയതിനും മറുപടി ലഭിച്ചിട്ടില്ല. നാലാം തവണയാണ് പരിശോധനാ ഫലം ഹാജരാക്കുന്നതിനായി പോലീസ് നോട്ടീസ് നല്കുന്നതെന്നും ഡല്ഹി ക്രൈംബ്രാഞ്ച് വ്യക്തമാക്കി.