കൊറോണ വൈറസ് വ്യാപനത്തെ തുടര്‍ന്ന് ലോക്ക് ഡൗണ്‍ പ്രഖ്യാപിച്ചതോടെ കായിക താരങ്ങളെല്ലാം സ്വന്തം വീടുകളില്‍ തന്നെയാണ്. ജോലി തിരക്കുകളില്‍ നിന്നെല്ലാം മാറി കുടുംബത്തോടൊപ്പം സമയം ചെലവിടുകയാണ് താരങ്ങളെല്ലാം. തങ്ങളുടെ വിശേഷങ്ങളെല്ലാം താരങ്ങള്‍ സാമൂഹ്യ മാദ്ധ്യമങ്ങളിലൂടെ ആരാധകരെ അറിയിക്കുന്നുമുണ്ട്. അത്തരത്തില്‍ തന്റെ മകളുമൊത്തുള്ള ചിത്രം പങ്കുവെച്ചിരിക്കുകയാണ് ക്രിക്കറ്റ് ഇതിഹാസം സച്ചിന്‍ ടെണ്ടുള്‍ക്കര്‍.
ലോക്ക് ഡൗണ്‍ നിമിഷങ്ങള്‍ എങ്ങനെയെല്ലാം സന്തോഷകരമാക്കാമെന്നാണ് സച്ചിന്‍ ആരാധകരോട് പറയുന്നത്. മകള്‍ സാറാ ടെണ്ടുല്‍ക്കര്‍ തനിക്ക് വേണ്ടി പാചകം ചെയ്ത വിഭവം ആരാധകര്‍ക്കായി സച്ചിന്‍ പങ്കുവെച്ചു. ഇന്‍സ്റ്റഗ്രാമിലൂടെയാണ് അദ്ദേഹം മകളുമൊത്തുള്ള ചിത്രങ്ങള്‍ പങ്കുവെച്ചത്.
അറുപത് സെക്കന്‍ഡു കൊണ്ടു കഴിഞ്ഞു. രുചികരമായ ബീറ്റ്‌റൂട്ട് കബാബിന് നന്ദി. അദ്ദേഹം ഇന്‍സ്റ്റഗ്രാമില്‍ കുറിച്ചു. സാമൂഹ്യ മാദ്ധ്യമങ്ങളില്‍ വന്‍ സ്വീകാര്യതയാണ് ചിത്രത്തിന് ലഭിച്ചിരിക്കുന്നത്.
കൊറോണ വൈറസ് വ്യാപനത്തെ തുടര്‍ന്ന് ലോകമെമ്പാടുമുള്ള കായിക മത്സരങ്ങള്‍ നിര്‍ത്തിവെച്ചിരിക്കുകയാണ്. അതിനാല്‍ തന്നെ കായിക താരങ്ങള്‍ മാനസികമായി കൂടുതല്‍ കരുത്താര്‍ജിക്കാനുള്ള സാഹചര്യമായി ഈ സമയം കാണണമെന്ന് സച്ചിന്‍ നേരത്തെ പറഞ്ഞരുന്നു. തുടര്‍ച്ചയായി കളിക്കുന്നത് കൊണ്ട് അദ്ദേഹം മുന്‍നിര കളിക്കാരനാകില്ലെന്നും ഇടയ്‌ക്കൊക്കെ കളിയില്‍ നിന്നും വിട്ടുമാറി ബാറ്ററി റീച്ചാര്‍ജ് ചെയ്യേണ്ടതുണ്ടെന്നും സച്ചിന്‍ ട്വിറ്ററില്‍ കുറിച്ചിരുന്നു.
https://www.instagram.com/p/B_2mdBrlPDu/?utm_source=ig_embed
