മുംബൈ : ആദ്യ വരവിൽ തന്നെ ഇന്ത്യൻ വിപണിയിൽ വ്യക്തമായ സ്വാധീനം ചുമത്തിയ കമ്പനിയാണ് കിയ മോട്ടോഴ്സ്. കിയയുടെ ജനപ്രിയ മോഡലായ സെൽറ്റോസിന് ആവശ്യക്കാർ ഏറെയാണ്. ഇപ്പോഴിതാ നിലവിലുള്ള മോഡലിൽ നിരവധി പരിഷ്കാരങ്ങളുമായി പുതിയ സെൽറ്റോസ് പുറത്തിറക്കാനൊരുങ്ങുകയാണ് കിയ.
പുതിയ എക്സ്റ്റീരിയർ, ഇന്റീരിയർ, കംഫർട്ട് സവിശേഷതകളുമായിട്ടാവും പതിപ്പുകൾ എത്തുന്നത്. ആറ് എഞ്ചിൻ-ഗിയർബോക്സ് ഓപ്ഷനുകൾ ഉൾപ്പെടെ മൊത്തം 18 പതിപ്പുകളിൽ സെൽറ്റോസ് ലഭ്യമാണ്. എല്ലാ വകഭേദങ്ങളിലും ഒന്നാമത്തെയും രണ്ടാമത്തെയും നിര സീറ്റുകൾക്ക് യുഎസ്ബി ചാർജിംഗ്, സ്റ്റാൻഡേർഡായി എമർജൻസി സ്റ്റോപ്പ് സിഗ്നൽ എന്നിവ പോലുള്ള സവിശേഷതകൾ കമ്പനി ഉപഭോക്താക്കൾക്കായി വാഗ്ദാനം ചെയ്യുന്നു.
ലോക്ക്ഡൗൺ നിയന്ത്രണങ്ങൾ ലഘൂകരിച്ചതോടെ വാഹനവുമായി ബന്ധപ്പെട്ട പ്രവർത്തനങ്ങൾ കിയ മോട്ടോഴ്സ് പുനരാരംഭിച്ചിട്ടുണ്ട്. അപ്ഡേറ്റുചെയ്ത സവിശേഷതകളുമായി സെൽറ്റോസ് വരും മാസങ്ങളിൽ വിൽപ്പനയ്ക്കെത്തും. പുതിയ പരിഷ്കരണങ്ങൾക്കൊപ്പം വാഹനത്തിന്റെ വിലയിൽ വർദ്ധനവ് ഉണ്ടാകുമെന്നും റിപ്പോർട്ടുകളുണ്ട്.
