നൈനിറ്റാള്‍: ആനകള്‍ക്കും പുള്ളിപ്പുലികള്‍ക്കും രക്ഷയൊരുക്കാന്‍ ഉത്തരാഖണ്ഡ് വനം വകുപ്പ്. ഉത്തരാഖണ്ഡിലെ പ്രസിദ്ധമായ രാജാജി ദേശീയ ഉദ്യോനത്തിലെ വന്യമൃഗങ്ങളുടെ സംരക്ഷണത്തിനാണ് പ്രത്യേക സേനയെ പരിശീലിപ്പിച്ചത്. ഇതിനായി രണ്ടു പ്രത്യേക സംഘങ്ങളെ ഏര്‍പ്പാടാക്കിയിട്ടുണ്ട്. കഴിഞ്ഞ ദിവസം ഒരു ആനയ്‌ക്ക് മുറിവേറ്റതായി കണ്ടെത്തിയതോടെയാണ് നിരീക്ഷണവും സംരക്ഷണവും ശക്തമാക്കാന്‍ തീരുമാനിച്ചതെന്ന് വനം വകുപ്പ് മേധാവി അനില്‍ വെര്‍മ അറിയിച്ചു.
ദേശീയ ഉദ്യാനങ്ങളിലെ വന്യജീവിസംരക്ഷണത്തിനായി സംയുക്തയോഗം നടന്നിരുന്നു. യോഗത്തില്‍ ഹരിദ്വാര്‍, ഡെറാഡൂണ്‍ വനം വകുപ്പ് ഉദ്യോഗസ്ഥരും രാജാജി കടുവാ സംരക്ഷണ വിഭാഗവും പങ്കെടുത്തു. രാജാജി കടുവാ സംരക്ഷണ മേഖലയുടെ രണ്ട് അതിര്‍ത്തികള്‍ പങ്കിടുന്നത് ഹരിദ്വാര്‍ വനമേഖലയാണ്. ആനകള്‍ ധാരാളം രണ്ടു മേഖലകളിലേക്കും യാത്രചെയ്യാറുമുണ്ട്. ആനകള്‍ക്കുണ്ടാകുന്ന അപകടങ്ങളും ആനക്കൊമ്പ് വേട്ടയും തടയാനാണ് സംയുക്ത സേനയെ വിന്യസിക്കുന്നതെന്ന് അനില്‍ വെര്‍മ വ്യക്തമാക്കി.
ഇതിന് സമാനമായിട്ടാണ് പുള്ളിപ്പുലികളുടെ സംരക്ഷണത്തിനും സേനയെ തയ്യാറക്കിയത്. എന്നാല്‍ അത് കൂടുതലും അതാത് മേഖലകളിലെ സേനകള്‍ തന്നെയാണെന്നും ഒരു സംഘത്തില്‍ 12 പേരാണുള്ളതെന്നും അനില്‍ വെര്‍മ അറിയിച്ചു.മെയ് മാസം 27നാണ് മുറിവേറ്റ നിലയില്‍ ആനയെ കണ്ടെത്തിയത്. 14 മണിക്കൂര്‍ നീണ്ട രക്ഷാ പ്രവര്‍ത്തനങ്ങള്‍ക്ക് ശേഷമാണ് ആനയുടെ ജീവന്‍ രക്ഷിക്കാനായതെന്നും വനം വകുപ്പറിയിച്ചു.
