കുവൈത്ത് സിറ്റി: അന്താരാഷ്ട്ര വിമാനത്താവളത്തിന് നേരെ ഇറാന് നടത്തിയ മിസൈല്-ഡ്രോണ് ആക്രമണങ്ങള്ക്ക് പിന്നാലെ നയതന്ത്ര നടപടികള് കടുപ്പിച്ച് കുവൈത്ത് ഭരണകൂടം. കുവൈത്തിലെ ഇറാന് എംബസിയിലെ രണ്ട് ഉന്നത നയതന്ത്ര ഉദ്യോഗസ്ഥരെ രാജ്യം ഔദ്യോഗികമായി പുറത്താക്കി. ഇരുവരോടും 24 മണിക്കൂറിനകം കുവൈത്ത് വിട്ടുപോകാനാണ് വിദേശകാര്യ മന്ത്രാലയം കര്ശന ഉത്തരവ് നല്കിയിരിക്കുന്നത്.
കുവൈത്ത് വിദേശകാര്യ ഡെപ്യൂട്ടി മന്ത്രി ഹമദ് സുലൈമാന് അല് മഷാന്, ഇറാന്റെ ചാര്ജ് ഡി അഫയേഴ്സ് ഹമീദ് യാക്കൂബി ഫറിനെ നേരിട്ട് വിളിച്ചുവരുത്തിയാണ് പുറത്താക്കല് ഉത്തരവ് അടങ്ങിയ പ്രതിഷേധക്കുറിപ്പ് കൈമാറിയത്. രാജ്യത്തെ ഇറാന് എംബസി ജീവനക്കാരുടെ എണ്ണം വെട്ടിച്ചുരുക്കുന്നതിന്റെ ഭാഗമായാണ് ഈ രണ്ട് ഉദ്യോഗസ്ഥരെ ‘പെര്സോണ നോണ് ഗ്രാറ്റ’ ആയി പ്രഖ്യാപിച്ചതെന്ന് കുവൈത്ത് വ്യക്തമാക്കി. തങ്ങളുടെ പരമാധികാരത്തിന് മേല് ഇറാന് നടത്തിയ കടന്നുകയറ്റത്തിനുള്ള ശക്തമായ മറുപടിയാണിത്.
കുവൈത്ത് വിമാനത്താവളത്തിലെ യാത്രാ ടെര്മിനല് ലക്ഷ്യമാക്കി ഇറാന് നടത്തിയ അപ്രതീക്ഷിത ആക്രമണമാണ് ഇരു രാജ്യങ്ങളും തമ്മിലുള്ള ബന്ധം വഷളാക്കിയത്. ആക്രമണത്തില് മധ്യപ്രദേശ് സ്വദേശിയായ ഇന്ത്യന് പ്രവാസി കൊല്ലപ്പെട്ടിരുന്നു. ഒരു മരണത്തിന് പുറമെ പ്രവാസികളടക്കം 63 പേര്ക്ക് പരിക്കേല്ക്കുകയും ചെയ്തു. നിലവിലെ കടുത്ത സുരക്ഷാ പ്രതിസന്ധി നേരിടുന്നതിനായി പ്രാദേശിക, അന്തര്ദേശീയ പങ്കാളികളുമായി ചേര്ന്ന് കൂടുതല് ശക്തമായ പ്രതിരോധ നീക്കങ്ങളുമായി മുന്നോട്ട് പോകാനാണ് കുവൈത്തിന്റെ തീരുമാനം. ഇതോടെ മിഡില് ഈസ്റ്റില് നയതന്ത്ര യുദ്ധം കൂടുതല് സങ്കീര്ണ്ണമാവുകയാണ്.
