അഹമ്മദാബാദ്: ടെസ്റ്റ് ക്രിക്കറ്റില് മോശം വെളിച്ചം മൂലം കളി തടസ്സപ്പെടുന്നത് ഒഴിവാക്കാന് വിപ്ലവകരമായ മാറ്റത്തിനൊരുങ്ങി അന്താരാഷ്ട്ര ക്രിക്കറ്റ് കൗണ്സില്. മോശം വെളിച്ചം ബാധിക്കാന് സാധ്യതയുണ്ടെന്ന് മുന്കൂട്ടി വിലയിരുത്തുന്ന ടെസ്റ്റ് മത്സരങ്ങളില്, ഇരു ടീമുകളുടെയും സമ്മതത്തോടെ ചുവന്ന പന്തിന് പകരം പിങ്ക് പന്ത് ഉപയോഗിച്ച് മത്സരം നടത്താനുള്ള പരീക്ഷണത്തിന് ഐസിസി അനുമതി നല്കി. അഹമ്മദാബാദില് ചേര്ന്ന ഐസിസി ബോര്ഡ് യോഗത്തിലാണ് ചീഫ് എക്സിക്യൂട്ടീവ് കമ്മിറ്റിയുടെ ഈ ശുപാര്ശയ്ക്ക് അംഗീകാരം ലഭിച്ചത്.
നിലവില് ഡേ-നൈറ്റ് ടെസ്റ്റുകളില് മാത്രമാണ് പിങ്ക് പന്തുകള് ഉപയോഗിക്കുന്നത്. പരീക്ഷണം വിജയകരമായാല് സാധാരണ പകല് നടക്കുന്ന ടെസ്റ്റ് മത്സരങ്ങളിലും വെളിച്ചക്കുറവുള്ളപ്പോള് കളി തുടരാന് ഇത് സഹായിക്കും. എന്നാല് ജൂണ് 4-ന് ആരംഭിക്കുന്ന ഇംഗ്ലണ്ട് – ന്യൂസിലന്ഡ് പരമ്പരയില് ഈ പുതിയ നിയമം പ്രാബല്യത്തില് വരില്ല. വെളിച്ചക്കുറവ് മൂലമുള്ള സമയനഷ്ടം കുറയ്ക്കുന്നതിനായി മെരിലബോണ് ക്രിക്കറ്റ് ക്ലബ്ബുമായി ചേര്ന്ന് ലൈറ്റിംഗ് സാങ്കേതികവിദ്യയില് കൂടുതല് ഗവേഷണങ്ങള് നടത്തുമെന്നും ഐസിസി അറിയിച്ചു.
ഏകദിന, ട്വന്റി-20 മത്സരങ്ങളില് നിശ്ചയിച്ചിട്ടുള്ള ഡ്രിങ്ക്സ് ബ്രേക്കുകളുടെ സമയത്ത് ഹെഡ് കോച്ചുമാര്ക്കോ നിര്ദ്ദിഷ്ട സ്റ്റാഫിനോ ഗ്രൗണ്ടില് പ്രവേശിച്ച് കളിക്കാരുമായി തന്ത്രങ്ങള് ചര്ച്ച ചെയ്യാന് ഐസിസി അനുമതി നല്കി. മുന്പ് രാജ്യാന്തര ക്രിക്കറ്റില് ഇതിന് അനുവാദമുണ്ടായിരുന്നില്ല. ഡ്രിങ്ക്സ് കൊണ്ടുവരുന്ന കളിക്കാര് വഴിയായിരുന്നു സന്ദേശങ്ങള് കൈമാറിയിരുന്നത്. എന്നാല് ഐപിഎല് പോലുള്ള ഫ്രാഞ്ചൈസി ലീഗുകളിലെ സ്ട്രാറ്റജിക് ടൈംഔട്ട് മാതൃകയിലാണ് ഇപ്പോള് ഈ മാറ്റം കൊണ്ടുവന്നിരിക്കുന്നത്.
കൂടാതെ, ടി20 മത്സരങ്ങളില് ഇന്നിംഗ്സ് ഇടവേള 15 മിനിറ്റായിരിക്കുമെന്നും കളി പുനരാരംഭിക്കുമ്പോള് ബാറ്റര്മാര് തയ്യാറായിരിക്കണമെന്നും ഐസിസി വ്യക്തമാക്കി. ബാറ്റര് ക്രീസില് ചലിക്കുന്നതിനനുസരിച്ച് ലെഗ് സൈഡിലെ വൈഡുകള് കൃത്യമായി നിര്ണ്ണയിക്കാന് അമ്പയര്മാരെ സഹായിക്കുന്ന ‘ഗൈഡ് ലൈനുകള്’ സ്ഥിരമായി ഉപയോഗിക്കാന് ഐസിസി തീരുമാനിച്ചു. 2025-ല് ആരംഭിച്ച ഇതിന്റെ പരീക്ഷണം വിജയകരമായതിനെ തുടര്ന്നാണിത്.
സംശയസ്പദമായ ബൗളിംഗ് ആക്ഷനുകള് റിപ്പോര്ട്ട് ചെയ്യുന്നതിന് മുന്പ് അത് കൃത്യമായി വിലയിരുത്താന് മാച്ച് ഒഫീഷ്യലുകള്ക്ക് ഹോക്ക്-ഐ ഡാറ്റ ലഭ്യമാക്കുമെന്നും ഐസിസി അറിയിച്ചു.
