ലണ്ടന്: ആഗോള രംഗത്തെ വാക്സിന് ഗവേഷണ നിര്മ്മാണ ദൗത്യത്തില് ഇന്ത്യയെ ക്ഷണിച്ച് ബ്രിട്ടണ്. 50 രാജ്യങ്ങളുടെ വൈദ്യശാസ്ത്ര ഗവേഷണ സ്ഥാപനങ്ങള് പങ്കെടുക്കുന്ന ആഗോള വാക്സിന് ഉച്ചകോടിയിലാണ് ഇന്ത്യ പങ്കെടുക്കുക. ലോകത്തെ എല്ലാ രാജ്യങ്ങളുടേയും രോഗ പ്രതിരോധ ആവശ്യങ്ങള്ക്കായുള്ള സൗകര്യവും സഹകരണവും ഗവേഷണവും നിര്മ്മാണവും ഉറപ്പുവരുത്തലാണ് സമ്മേളനത്തിന്റെ മുഖ്യ ഉദ്ദേശം. കൊറോണ പ്രതിരോധപ്രവര്ത്തനത്തില് ഇന്ത്യ നല്കുന്ന സംഭാവനകളെ മുന്നിര്ത്തിയാണ് ബ്രിട്ടന്റെ ആദരവ്.
വീഡിയോ കോണ്ഫറന്സായി നടക്കാന് പോകുന്ന സമ്മേളനത്തില് വിവിധ രാജ്യങ്ങളിലെ ഐക്യരാഷ്ട്ര സഭാ പ്രതിനിധികള്, നേതാക്കന്മാര്, ആരോഗ്യ വകുപ്പ് മന്ത്രിമാര്, വ്യവസായ പ്രമുഖര് എന്നിവര് പങ്കെടുക്കും. ചില രാജ്യങ്ങളിലെ പ്രധാനമന്ത്രിമാരേയും സമ്മേളനത്തിലേക്ക് ക്ഷണിച്ചിട്ടുണ്ട്. നിലവിലെ കൊറോണ പ്രതിരോധ പ്രവര്ത്തനത്തിന്റെ പശ്ചാത്തലത്തില് ഒരോ രാജ്യത്തും നടക്കുന്ന പരിശ്രമങ്ങളും കൂട്ടായി ചെയ്യേണ്ട ഗവേഷണവും ചര്ച്ചചെയ്യുമെന്നാണറിവ്. ഐക്യരാഷ്ട്രസഭ സെക്രട്ടറി ജനറലും പ്രതിനിധികളെ അഭിസംബോധനചെയ്യും.
‘ സമ്മേളനം മാനവസൂഹത്തിന് ഈ പ്രതിസന്ധിഘട്ടത്തില് വലിയ പ്രതീക്ഷയാണ് നല്കുന്നത്. ഇത് ആഗോള ചികിത്സാരംഗത്ത് ഒരു പുതിയ യുഗപ്പിറവിക്ക് കാരണമാകും’ പ്രതിനിധികളെ ക്ഷണിച്ചുകൊണ്ട് ബ്രിട്ടീഷ് പ്രധാനമന്ത്രി ബോറിസ് ജോണ്സണ് പറഞ്ഞു.
