ഹൈദരാബാദ്: ഇന്ത്യന്‍ സ്പിന്നറായിരുന്ന ഹര്‍ഭജന്‍ സിംഗിനെ പ്രശംസിച്ച് മുന്‍ ബാറ്റ്‌സ്മാന്‍ വി.വി.എസ്.ലക്ഷ്മണ്‍. എത്ര സമ്മര്‍ദ്ദം സ്വയം അനുഭവിച്ചാലും അതിനെ കളിക്കളത്തിലെ വാശിയാക്കി മാറ്റുന്ന താരമാണെന്നാണ് പ്രശംസ. എതിരാളി എത്ര ശക്തനായാലും സാഹചര്യം എത്ര പ്രതികൂലമായാലും ഹര്‍ഭജന്റെ വാശി കൂടുകയാണ് ചെയ്യുകയെന്ന് ലക്ഷ്മണ്‍ വ്യക്തമാക്കി.
ഹര്‍ഭജന്റെ ഒരു പഴയ ചിത്രം ട്വിറ്ററിലൂടെ അയച്ചുകൊണ്ടാണ് മുന്‍ സഹതാരത്തെ പ്രശംസിച്ചത്. ഒരിക്കലും വിട്ടുകൊടുക്കാത്ത സ്വഭാവം ഹര്‍ഭജനെ യഥാര്‍ത്ഥപോരാളിയാക്കി. തനിക്ക് ഹര്‍ഭജന്‍ ശരിക്കും നല്ല പ്രേരണയായിരുന്നു എന്നും വി.വി.എസ്. ലക്ഷ്മണ്‍ പറഞ്ഞു.
‘മറ്റേതുതാരവും എളുപ്പം പതറിപ്പോകാവുന്ന അന്താരാഷ്‌ട്ര മത്സരങ്ങളുടെ സമ്മര്‍ദ്ദം ഹര്‍ഭജനില്‍ പോരാട്ട വീര്യം കൂട്ടുകയാണ് ചെയ്യുക.നിരാശയെ ശക്തമായ വീറുംവാശിയുമാക്കി മാറ്റുക എന്നത് ഈ കഴിഞ്ഞ ഒന്നര ദശകത്തിലെ ഹര്‍ഭജനില്‍ മാത്രം കണ്ട പ്രത്യേകതയാണ്’ ലക്ഷ്മണ്‍ ട്വിറ്ററില്‍ കുറിച്ചു.
