ഗുവാഹത്തി: കഠിനമായ വയറു വേദനയുമായെത്തിയ യുവാവിന്റെ മൂത്രാശയത്തില് നിന്നും ചാര്ജര് കണ്ടെത്തി. അസമിലാണ് സംഭവം. യുവാവിന്റെ മൂത്രാശയത്തില് കുടുങ്ങിയ ചാര്ജര് ഡോക്ടര്മാര് ശസ്ത്രക്രിയയിലൂടെ പുറത്തെടുത്തു. ഹെഡ്ഫോണിന്റെ കേബിള് അറിയാതെ വയറ്റില് പോയെന്നും കഠിനമായ വയറു വേദനയുണ്ടെന്നും പറഞ്ഞ് ദിവസങ്ങള്ക്ക് മുന്പാണ് 30 കാരനായ യുവാവ് ഗുവാഹത്തിയിലെ സ്വകാര്യ ആശുപത്രിയിലെത്തുന്നത്.
എന്നാല് എക്സറേ പരിശോധനയില് യുവാവിന്റെ മൂത്രാശയത്തില് ചാര്ജറിന്റെ കേബിള് കണ്ടെത്തി. പിന്നീട് ശസ്ത്രക്രിയിയലൂടെ ചാര്ജര് പുറത്തെടുത്തുവെന്നും യുവാവിന്റെ ആരോഗ്യ നില തൃപ്തികരമാണെന്നും ശസ്ത്രക്രിയയ്ക്ക് നേതൃത്വം നല്കിയ ഡോക്ടര് വ്യക്തമാക്കി. യുവാവിന്റെ പേരോ മറ്റ് വിവരങ്ങളോ ഡോക്ടര് പുറത്തു വിട്ടിട്ടില്ല.
തന്റെ 25 വര്ഷത്തെ സര്വ്വീസിനിടയില് ഇത്തരമൊരു അനുഭവം ആദ്യമാണെന്നും ഡോക്ടര് വെളിപ്പെടുത്തി. യാദൃശ്ചികമായി ഹെഡ്ഫോണിന്റെ കേബിള് ഉള്ളില് പോയെന്നും അടിവയര് വേദനിക്കുന്നുവെന്നും പറഞ്ഞാണ് യുവാവ് തന്നെ സമീപിച്ചതെന്നും എന്നാല് പരിശോധനയില് മൂത്രാശയത്തില് മൊബൈല് ചാര്ജറിന്റെ കോഡ് കണ്ടെത്തിയെന്നും ഡോക്ടര് പറഞ്ഞു. ഇയാളുടെ മാനസിക നില ഇപ്പോഴും ഒരു ചോദ്യ ചിഹ്നമായി നിലനില്ക്കുകയാണെന്നും അദ്ദേഹം കൂട്ടിച്ചേര്ത്തു.
