ന്യൂഡല്ഹി: ഒരു ടീമിനും പരിശീലനം കൊടുക്കാത്തയാളെ നിയമിച്ച് ലോകകിരീടം നേടിയ ബി.സി.സി.ഐയുടെ തീരുമാനത്തെ ഓര്ത്തെടുത്ത് ഗ്യാരീ കേസ്റ്റന്. 2007ല് ഇന്ത്യന് ക്രിക്കറ്റ് ടീമിന്റെ പരിശീലകനെന്ന ചുമതലയിലേക്ക് മനസ്സില്ലാമനസ്സോടെ കടന്നുവന്ന സംഭവങ്ങളാണ് അന്താരാഷ്ട്ര മാദ്ധ്യമത്തിന് നല്കിയ അഭിമുഖത്തില് മുന് ദക്ഷിണാഫ്രിക്കന് നായകനും ഓപ്പണറുമായ ഗ്യാരീ കേസ്റ്റണ് പങ്കുവച്ചത്. 2009ല് ടീം ഇന്ത്യ കേസ്റ്റന്റെ കീഴില് ലോക ഒന്നാം നമ്പര് ടെസ്റ്റ് ടീമും 2011ല് ലോക കിരീടവും നേടി ചരിത്രം കുറിച്ചു.
സുനില് ഗവാസ്ക്കര് പരിശീലകരുടെ സെലക്ഷന് കമ്മിറ്റി അംഗമെന്ന നിലയില് എനിക്ക് രണ്ട് ഇ-മെയില് അയച്ചു. താന് അതിന് പ്രത്യേകിച്ച് മറുപടി നല്കിയില്ല. തീരുമാനം എടുക്കാ നായി തന്റെ ഭാര്യയെ ഇന്ത്യയുടെ ആവശ്യം കാണിച്ചു. അവര് തെറ്റായ ആളെയാണ് വിളിച്ചി രിക്കുന്നതെന്ന മറുപടിയാണ് സ്വന്തം ഭാര്യപോലും തന്നത്.
ഗവാസ്ക്കറുടെ നിര്ബന്ധത്തിന് വഴങ്ങി ഗ്രേക് ചാപ്പലെന്ന ഓസ്ട്രേലിയന് പ്രതിഭ പരിശീ ലിപ്പിച്ച ടീം ഇന്ത്യക്കായി അഭിമുഖത്തിന് പോയി. ചെന്നിറങ്ങിയപാടെ അനില് കുംബ്ലെയും താനും പരസ്പരം അഭിമുഖത്തിന്റെ കാര്യം പറഞ്ഞ് ഏറെ നേരം ചിരിച്ചുവെന്നും കേസ്റ്റണ് പറഞ്ഞു.
അഭിമുഖത്തിനുണ്ടായിരുന്ന രവിശാസ്ത്രിയോട് തനിക്ക് ഒരു പദ്ധതിയുമില്ലെന്ന് തുറന്നു പറഞ്ഞു. എന്നാല് ശാസ്ത്രിയുടെ അടുത്ത ചോദ്യത്തില് താന്വീണു. ഇന്ത്യക്കെതിരെ ദക്ഷിണാഫ്രിക്ക ജയിക്കാനായി എന്തൊക്കെ പദ്ധതികളാണ് തയ്യാറാക്കാറെന്നായിരുന്നു ആ ചോദ്യം. അതിനുത്തരം പറഞ്ഞതോടെ ഒരു കോണ്ട്രാക്ട് എടുത്തുനീട്ടി ഒപ്പിടാന് പറഞ്ഞു. അതില് പോലും തന്റെ പേരിന് പകരം ഗ്രേഗ് ചാപ്പലിന്റെ പേര് തെറ്റായി അടിച്ചുവച്ചത് ആകെ ചിരിപടര്ത്തിയെന്നും കേസ്റ്റണ് പറഞ്ഞു.
