ന്യൂഡല്ഹി: കൊറോണ വ്യാപനത്തെ തടയാന് സഹായ ഹസ്തവുമായി കേന്ദ്രസര്ക്കാര്. ഡല്ഹിയില് തീവണ്ടികളില് ആശുപത്രി സംവിധാനം ഒരുക്കിയാണ് കേന്ദ്ര ആരോഗ്യ മന്ത്രാലയം രക്ഷക്കെത്തിയിരിക്കുന്നത്. ആശുപത്രികളിലെ സംവിധാനങ്ങള് ഒരുക്കുന്നതില് പരാജയപ്പെട്ട കേജ്രിവാള് സര്ക്കാറിനെതിരെ ജനരോഷം ഉയരുന്നതിനിടെയാണ് കേന്ദ്ര ത്തിന്റെ നടപടി. കഴിഞ്ഞ ദിവസം അമിത് ഷാ നടത്തിയ യോഗത്തിന് ശേഷമാണ് കേന്ദ്ര സര്ക്കാര് നേരിട്ട് കാര്യങ്ങള് ഏറ്റെടുത്തത്. വ്യാപകമായ പരിശോധനയ്ക്കായി കേന്ദ്ര ആരോഗ്യമന്ത്രാലയം നിര്ദ്ദേശം നല്കിക്കഴിഞ്ഞു. റെയില്വേയുടെ 200 തീവണ്ടികളാണ് ഡല്ഹി റെയില്വേ സ്റ്റേഷനില് താല്ക്കാലിക ആശുപത്രികളാക്കി മാറ്റിയിരിക്കുന്നത്. ആനന്ദ് വിഹാര് ടെര്മിനല് സ്റ്റേഷനിലാണ് സംവിധാനം ഒരുക്കിയിരിക്കുന്നത്.
ഐസൊലേഷന് സംവിധാനങ്ങള്ക്കാണ് തീവണ്ടികള് ഉപയോഗിക്കുകയെന്നും രോഗ ലക്ഷണം രൂക്ഷമാകുന്നവരെ മാത്രമാണ്് ആശുപത്രികളിലാക്കുക എന്നും കേന്ദ്ര ആരോഗ്യവകുപ്പറിയിച്ചു. തീവണ്ടികളിലായി 500 വാര്ഡുകളാണ് തയ്യാറാക്കിയത്. ഇത്രയും വാര്ഡുകളിലായി 8000 പേരെ താമസിപ്പിക്കാം. നിലവില് 59 തീവണ്ടികള് ഷാകുര്ബസ്തി മേഖലയില് കൊറോണ സേവനത്തിന് ഉപയോഗിച്ച് തുടങ്ങിയതായും റെയില്വേ അറിയിച്ചു. ഓക്സിജന് സംവിധാനവും കിടക്കകളും പുതപ്പും അടക്കമാണ് ഒരോ സീറ്റുകളിലും ലഭിക്കുക. ഒരോ മണിക്കൂറിലും കോച്ചുകള് അണുവിമുക്തമാക്കാനുള്ള സംവിധാനവും ഒരുക്കിയതായി റെയില്വേ അറിയിച്ചു.