തിരുവനന്തപുരം: വിശാലിന്റെ ഏറ്റവും പുതിയ സിനിമയായ ‘ചക്ര’ യുടെ മലയാളം ട്രെയിലര് മോഹന്ലാല് പുറത്തിറക്കി. ത്രസിപ്പിക്കുന്ന ഹൈ വോള്ട്ടേജ് ആക്ഷന് ചിത്രമാണിതെന്ന് ട്രെയിലര് വ്യക്തമാക്കുന്നു. സൈബര് ക്രൈമിന്റെ പാശ്ചാത്തലത്തിലുള്ള ഒരു ആക്ഷന് ത്രില്ലര് സിനിമയാണിത്.
ഗൗരവമേറിയ ഒരു സാമൂഹിക പ്രശ്നത്തിലേക്കും ചിത്രം വിരല് ചൂണ്ടുന്നു. തമിഴ്, മലയാളം, തെലുങ്ക്, കന്നഡ എന്നീ ഭാഷളിലായിട്ടാണ് ‘ചക്ര’ പ്രദര്ശനത്തിനെത്തുക. മറ്റു ഭാഷകളില് ചിത്രത്തിന്റെ ട്രെയിലറുകള് തമിഴില് കാര്ത്തി, ആര്യ, തെലുങ്കില് റാണാ ദുഗ്ഗുബട്ടി, കന്നഡയില് യഷ് എന്നിവരാണ് തങ്ങളുടെ ട്വിറ്റര് പേജുകളിലൂടെ റിലീസ് ചെയ്തത്.
വിശാല് തന്റെ ‘വിശാല് ഫിലിം ഫാക്ടറി’യുടെ ബാനറില് നിര്മ്മിക്കുന്ന ‘ചക്ര’യുടെ സംവിധായകന് നവാഗതനായ എം. എസ്. ആനന്ദാണ്. ഓണ്ലൈന് ബിസിനസ് രംഗത്തെ കാപട്യങ്ങളുടെയും, ചതികളുടേയും പശ്ചാത്തലത്തിലുള്ള പ്രമേയമാണ് ‘ചക്ര’യുടേത്. ഒരു മിലിട്ടറി ഓഫീസര് നായക കഥാപാത്രത്തെയാണ് വിശാല് അവതരിപ്പിക്കുന്നത്. ശ്രദ്ധാ ശ്രീനാഥ് പോലീസ് ഓഫീസറായി നായികാ കഥാപാത്രത്തെ അവതരിപ്പിക്കുന്നു.
റെജിനാ കസാന്ഡ്രെ മര്മ്മ പ്രധാനമായ കഥാപാത്രത്തെ അവതരിപ്പിക്കുന്നുണ്ട്. സൃഷ്ടി ഡാങ്കെ, കെ. ആര്. വിജയ, മനോബാല, റോബോ ഷങ്കര്, വിജയ് ബാബു എന്നിവരാണ് മറ്റു അഭിനേതാക്കള്. യുവന് ഷങ്കര് രാജയാണ് സംഗീത സംവിധായകന്. ബാലസുബ്രഹ്മണ്യമാണ് ക്യാമറ കൈകാര്യം ചെയ്യുന്നത്.