ഹൗസ് ബോട്ടുകള് എന്നു കേള്ക്കുമ്പോള് ആദ്യം മനസിലേക്കെത്തുന്നത് കുട്ടനാടാണ്. കേരളത്തില് വലിപ്പമുള്ള കായലും പ്രകൃതി ഭംഗിയും ഹൗസ് ബോട്ട് സര്വ്വീസും ലഭിക്കണമെങ്കില് തെക്ക് ഭാഗത്തേക്ക് പോകണമെന്നത് തെറ്റായ ധാരണയാണെന്ന് തെളിയിക്കുകയാണ് കേരളത്തിന്റെ വടക്കേ അറ്റത്തു കിടക്കുന്ന പറമ്പ് കായല്. അഷ്ടമുടിയും വേമ്പനാടും കഴിഞ്ഞാല് പിന്നെ കേരളത്തില് ഇവനെ കവച്ചുവെക്കാന് മറ്റാരും ഇല്ലെന്ന് തന്നെ പറയാം. ടൂറിസത്തെ കാസര്കോടുമായി ബന്ധിപ്പിക്കുമ്പോള് ബേക്കല്കോട്ടയാണ് ആദ്യം നമ്മളിലേക്കെത്തുന്നത്.
എന്നാല് അതിനപ്പുറം ഒരു വിനോദസഞ്ചാരകേന്ദ്രം കൂടി കാസര്കോട് ജില്ലയില് ഉണ്ടെന്ന് അധികമാര്ക്കും അറിയില്ല. കാസര്കോടിനെ പുതച്ചു കിടക്കുന്ന സുന്ദരമായ പറമ്പ് കായല്. അതിനോടു ചേര്ന്നുളള ചെറു ദ്വീപുകളും. ഇങ്ങനെയൊരു സ്ഥലം ഇവിടെ ഉള്ളതായി ആര്ക്കും അറിയാനിടയില്ല. അതുകൊണ്ടുതന്നെ പറമ്പ് കായല് പ്രശസ്തിയില് എത്താന് കുറച്ചു വൈകി എന്ന് പറയാം. എന്നാല് കേട്ടറിഞ്ഞ് പറമ്പ് കായല് കാണാനെത്തിയ സഞ്ചാരികള് ഇവുടത്തെ പ്രകൃതിഭംഗിയും ഹൗസ് ബോട്ട് സര്വീസുകളും, ഉപജീവനത്തിനായി തോണിയില് മീന് പിടിക്കുന്ന സാധാരണക്കാരെയും കണ്ടപ്പോള് പറമ്പ് കായലിന് മലബാറിന്റെ ആലപ്പുഴ എന്ന പേര് സമ്മാനിച്ചാണ് തിരികെ പോയത്. പേര് വെറുതെയല്ല അത്ര മനോഹരമാണ് ഇവിടം.
പറമ്പ് കാലിന്റെ ഭാഗമാണ് കവ്വായി കായല്. ഇവിടെയാണ് കവ്വായി ദ്വീപുകളും. ഇതുപോലെ ഒട്ടനവധി ദ്വീപുകള് ഇവിടെയുണ്ട്. ചെറുതോണി കളിലും ബോട്ടുകളിലും കായല് പരപ്പിലൂടെയുളള യാത്ര വളരെ മനോഹരമാണ്. കൂടാതെ ഒട്ടനവധി ഹൗസ് ബോട്ടുകളും ഇവിടെ സജീവം. കാസര്കോട് ജില്ലയിലെ ചെറുവത്തൂരില് നിന്ന് 5 കിലോമീറ്റര് അകലെയാണ് പറമ്പ് കായല് സ്ഥിതിചേയ്യുന്നത്. കൊവിഡില് നിന്നും മുക്തിനേടി കേരളം പഴയപോലെ ആകുമ്പോള് നിങ്ങളും വരണം മലബാറിന്റെ ആലപ്പുഴയിലേക്ക്.