സൂറത്ത്: കൊറോണ എന്ന മഹാമാരിയുടെ പിടിയിലാണ് ഇന്ന് ലോകം. വൈറസ് ബാധ പൊട്ടിപ്പുറപ്പെട്ടതോടെ നമുക്ക് ലഭിച്ച പുതിയ ശീലങ്ങളിലൊന്നാണ് മാസ്ക് ധരിക്കല്. വൈറസ് വ്യാപനം തടയുന്നതിന്റെ ഭാഗമായി രാജ്യത്ത് മാസ്ക് ധരിക്കല് നിര്ബന്ധമാക്കിയിരിക്കുകയാണ്. വിവിധ തരത്തിലുള്ള മാസ്കുകള് ഇപ്പോള് വിപണയില് ലഭ്യമാകാറുണ്ട്. അത്തരത്തില് വ്യത്യസ്തമായ ഒരു മാസ്ക്കാണ് സൂറത്തിലെ ഒരു ജ്വല്ലറിയിലുള്ളത്.
അല്പ്പം വിലകൂടിയ മാസ്ക് ആണിത്. ഒരു മാസ്കിന് 1.5 ലക്ഷം മുതല് 4 ലക്ഷം രൂപ വരെയാണ് വില. ഡയമണ്ട് പതിപ്പിച്ചതിനാലാണ് ഈ മാസ്കിന് ഇത്രയധികം വില. സര്ക്കാരിന്റെ മാര്ഗ നിര്ദ്ദേശങ്ങളെല്ലാം പാലിച്ചാണ് മാസ്കിനുള്ള തുണി തെരഞ്ഞെടുത്തതെന്ന് ജ്വല്ലറി ഉടമ ദീപക് ചോക്സി പറയുന്നു. വിവാഹത്തിന് വധുവിനും വരനും വ്യത്യസ്തമായ മാസ്ക് നിര്മ്മിക്കണമെന്ന് ഒരു ഉപഭോക്താവ് ആവശ്യപ്പെട്ടതിനെ തുടര്ന്നാണ് ഇത്തരമൊരു ആശയം ഉടലെടുത്തതെന്നും ദീപക് പറഞ്ഞു.
നിരവധി പേരാണ് ഡയമണ്ട് പതിപ്പിച്ച ഈ മാസ്കുകള് വാങ്ങാനെത്തുന്നതെന്നും മാസ്കിന് ഡിമാന്ഡ് ഏറെയാണെന്നും അദ്ദേഹം വ്യക്തമാക്കി. ഉപഭോക്താക്കളുടെ ആവശ്യാനുസരണം മാസ്കില് നിന്നും ഡയമണ്ട് മാറ്റി ആഭരണങ്ങള് നിര്മ്മിക്കാന് ഉപയോഗിക്കാന് കഴിയുമെന്നും അദ്ദേഹം കൂട്ടിച്ചേര്ത്തു. ശുദ്ധമായ വജ്രം ഉപയോഗിച്ചും അമേരിക്കന് വജ്രം ഉപയോഗിച്ചും സ്വര്ണം ഉപയോഗിച്ചുമാണ് മാസ്കുകള് രൂപകല്പ്പന ചെയ്തിരിക്കുന്നത്. അമേരിക്കന് വജ്രം ഉപയോഗിച്ചിരിക്കുന്ന മാസ്കിന് 1.5 ലക്ഷം രൂപയും ശുദ്ധമായ വജ്രം പതിപ്പിച്ച മാസ്കിന് 4 ലക്ഷം രൂപയുമാണ് വില.