ഇസ്ലാമാബാദ്: ക്രിക്കറ്റ് ഇതിഹാസം സുനില് ഗാവാസ്ക്കറെ പ്രശംസിച്ച് മുന് പാകിസ്താന് ക്യാപ്റ്റന് ഇന്സമാം ഉള് ഹഖ്. സുനില് ഗാവസ്ക്കര് തന്റെ ആദ്യകാലഘട്ടത്തില് നേടിയ 10,000 റണ്സുകളെന്നത് ഇന്നത്തെ 16000ന് തുല്യമാണെന്നാണ് ഇന്സാമിന്റെ വിലയിരുത്തല്. 1987ലാണ് സുനില് ഗവാസ്ക്കര് അക്കാലത്തെ അപ്രാപ്യമെന്ന് കരുതിയ 10,000 റണ്സുകള് അടിച്ചുകൂട്ടിയത്. പാകിസ്താനെതിരെ അഹമ്മദാബാദില് നടന്ന ടെസ്റ്റിലാണ് ആ ചരിത്രമുഹൂര്ത്തം കുറിച്ചതെന്നും ഇന്സമാം സൂചിപ്പിച്ചു.
പ്രതിഭാധനരായ മിയാന് ദാദ്, വിവ് റിച്ചാര്ഡ് എന്നിവരടക്കം പലരും ഗവാസ്ക്കറുടെ കാലത്തും അതിന് മുമ്പും ക്രിക്കറ്റ് ലോകത്തെ അനുഗ്രഹിച്ചിട്ടുണ്ട്. എന്നാല് ആദ്യമായി പതിനായിരം റണ്സ് തികയ്ക്കുക എന്ന നേട്ടം ഗവാസ്ക്കറാണ് സ്വന്തമാക്കിയതെന്നത് തികച്ചും അവിശ്വസനീയമായ പ്രകടനം കൊണ്ടാണെന്നും ഇന്സമാം പറഞ്ഞു.
‘ക്രിക്കറ്റ് ലോകത്ത് ഡോണ് ബ്രാഡ്മാന്, ഗ്യാരീ സോബേഴ്സ്, വിവ് റിച്ചാര്ഡ്സ്, മിയാന്ദാദ് എന്നിവരൊക്കെ മികച്ച ബാറ്റ്സ്മാന്മാരായിരുന്നു. പക്ഷെ അവരാരും ആ നേട്ടം സ്വന്തമാക്കിയവരല്ല. നിരവധി ടെസ്റ്റുമത്സരങ്ങള് ഒരു വര്ഷത്തില് നടക്കുന്ന ഇക്കാലത്തുപോലും ആ നേട്ടം വലിയ ഒരു നാഴികക്കല്ലാണ്. ഒരു മികച്ച ബാറ്റ്സ്മാന് ഒരു സീസണില് 1000 മുതല് 1500 റണ്സ് വരെ നേടാനാകാറുണ്ട്. എന്നാല് ഗവാസ്ക്കറുടെ സമയത്ത് ഇത്രയും മത്സരങ്ങളില്ല, ബാറ്റ്സ്മാന്മാര്ക്ക് റണ്സ് വാരിക്കൂട്ടാന് അത്ര അവസരങ്ങളുമില്ലായിരുന്നു’ യൂട്യൂബ് ചാനലിലൂടെ ഇന്സമാം പറഞ്ഞു.
120 ടെസ്റ്റുകള് കളിച്ച ഇന്സമാം 8830 റണ്സ് നേടിയ താരമാണ്. 378 ഏകദിനങ്ങളിലായി 11739 റണ്സും നേടിയിട്ടുണ്ട്.
