കൊല്ക്കത്ത: തീവണ്ടി വഴിയുള്ള കള്ളക്കടത്തു അതിര്ത്തി രക്ഷാസേന പിടികൂടി. ബംഗ്ലാദേശിലെ ദര്ഷാനായിലേയ്ക്ക് ഇന്ത്യയുടെ ഗീഡേയില് നിന്നും പുറപ്പെട്ട ചരക്കുവണ്ടിയിലാണ് സേന തിരച്ചില്നടത്തിയത്. 50 ലക്ഷത്തിന് മുകളില് വിലവരുന്ന സാധനസാമഗ്രികളാണ് നികുതി അടയ്ക്കാതെ കടത്താന് ശ്രമിച്ചതെന്ന് സേന പറഞ്ഞു. സ്ഥിരം പരിശോധനയുടെ ഭാഗമായി നടത്തിയ ശ്രമത്തിലാണ് ചരക്കുകളെല്ലാം അനധികൃതമാണെന്ന് കണ്ടെത്തിയത്.
ചരക്കുതീവണ്ടികള് പുറപ്പെടുന്ന കേന്ദ്രത്തില് വച്ച് സീല് ചെയ്തു കഴിഞ്ഞാല് പിന്നീട് ലക്ഷ്യസ്ഥാനത്തെത്തും വരെ തുറക്കാറില്ല. എന്നാല് തീവണ്ടി അതിര്ത്തി കടക്കുംമുമ്പ് ഒരു വാഗണിന്റെ സീല് ചെയ്ത ഭാഗം സംശയം തോന്നി പരിശോധിച്ചപ്പോഴാണ് കള്ളക്കടത്ത് പിടിക്കപ്പെട്ടത്. മയക്കുമരുന്നും ആയുധങ്ങളുമടക്കം കടത്താന് ഒരു മാര്ഗ്ഗമാക്കാന് പരീക്ഷിച്ചതാകാമെന്നാണ് സേന കരുതുന്നത്. നിലവില് പിടിച്ചെടുത്തവയില് ഭക്ഷ്യവസ്തുക്കള്ക്കൊപ്പം ചെരുപ്പുകള്, സൗന്ദര്യവര്ധക വസ്തുക്കള്, മൊബൈല്ഫോണുകള് എന്നിവയാണുണ്ടായിരുന്നത്. ഗീഡേയിലെ കസ്റ്റംസ് അധികൃതരുടെ സാന്നിദ്ധ്യത്തില് സേന എല്ലാ സാധനങ്ങളും പരിശോധിച്ച ശേഷം കൈമാറി. കള്ളക്കടത്തു സംഘത്തെക്കുറിച്ചുള്ള അന്വേഷണം ആരംഭിച്ചതായി കസ്റ്റംസ് അറിയിച്ചു.
