വാഷിംഗ്ടണ്‍: അമേരിക്കയുടെ ബഹിരാകാശ വാഹനം ഇന്ന് ഭൂമിയെ തൊടും. നാസയുടെ സ്‌പേസ് എക്‌സ് ഡെമോ-2 എന്ന വാഹനമാണ് രണ്ടു ബഹിരാകാശ സഞ്ചാരികളേയും വഹിച്ചുകൊണ്ട് ഭൂമിയില്‍ പതിക്കുക. ഫ്‌ലോറിഡയിലെ കടലിലാണ് പതിക്കാനുള്ള സ്ഥാനം നിശ്ചയിച്ചിരിക്കുന്നത്. നാസയുടെ ബഹിരാകാശ സഞ്ചാരികളായ ബോബ് ബെന്‍കെന്നും ഡൗ ഹര്‍ളിയുമാണ് ബഹിരാകാശ ദൗത്യം പൂര്‍ത്തിയാക്കി മടങ്ങി എത്തുന്നത്. ക്രൂ ഡ്രാഗണ്‍ എന്ന ബഹിരാകാശ നിലയത്തിലേയ്‌ക്ക് മെയ് 30നാണ് ഇരുവരും പോയത് 31-ാം തീയതി അവിടെ എത്തിച്ചേര്‍ന്നു.
രണ്ടു പ്രദേശങ്ങളാണ് ബഹിരാകാശ വാഹനത്തിന് തിരികെ ഇറങ്ങാനുള്ള സാധ്യതയായി കണ്ടെത്തിയതെന്ന് നാസ അറിയിച്ചു. മെക്‌സിക്കന്‍ ഉള്‍ക്കടലിലെ പനാമ നഗരത്തിനടുത്തും, പെന്‍സാകോളയുമാണ് സാധ്യതയുള്ള രണ്ടു കടല്‍ തീരങ്ങള്‍. ആദ്യ സ്ഥലമായി പെന്‍സാകോളയാണ് നിലവില്‍ നിശ്ചയിച്ചിരിക്കുന്നത്. ഇന്ത്യന്‍ സമയം രാത്രി 7.34നാണ് ബഹിരാകാശ വാഹനം ഭൂമിയില്‍ എത്തുക എന്നതാണ് നാസയുടെ മേധാവി ജിം ബേഡന്‍സ്‌റ്റൈന്‍ അറിയിച്ചിരിക്കുന്നത്. നിശ്ചയിക്കപ്പെട്ട സമയത്തിന് രണ്ടു മണിക്കൂര്‍ മുമ്പാണ് ബഹിരാകാശ സഞ്ചാരികളെ വഹിക്കുന്ന പേടകത്തിലെ ഫാല്‍ക്കണ്‍ 9 റോക്കറ്റ് പ്രവര്‍ത്തിപ്പിക്കുകയെന്നും ജിം പറഞ്ഞു.
