മുംബൈ: സുശാന്ത് സിംഗ് രജ്പുതിന്റെ മരണവുമായി ബന്ധപ്പെട്ടുള്ള അന്വേഷണത്തില് അടുത്ത ദിവസം ഹാജരാകണമെന്നുള്ള എന്ഫോഴ്സ്മെന്റ് ഡയറക്ടറേറ്റിന്റെ നിര്ദ്ദേശത്തില് നിന്നും തന്നെ ഒഴിവാക്കണമെന്ന ആവശ്യവുമായി റിയ ചക്രവര്ത്തി. ചോദ്യം ചെയ്യുന്നതിനായി വെള്ളിയാഴ്ച രാവിലെ ഹാജരാകണമെന്ന് ഇവരോട് ഇ.ഡി ആവശ്യപ്പെട്ടിരുന്നു. സാമ്പത്തിക തട്ടിപ്പ് കേസുമായി ബന്ധപ്പെട്ടാണ് ഇ.ഡിക്ക് മുന്പാകെ ഹാജരാകാന് നിര്ദ്ദേശിച്ചത്. പണമിടപാടുമായി ബന്ധപ്പെട്ടുള്ള എല്ലാ രേഖകളും ഹാജരാക്കണമെന്നും റിയയോട് നിര്ദ്ദേശിച്ചിരുന്നു.
സുശാന്തിന്റെ പിതാവ് നല്കിയ പരാതിയിന്മേലുള്ള അന്വേഷണം ബിഹാറിലെ പട്നയില് നിന്ന് മുംബൈയിലേക്ക് മാറ്റണമെന്ന് ആവശ്യപ്പെട്ട് റിയ സുപ്രീംകോടതിയില് ഹര്ജി ഫയല് ചെയ്തിരുന്നു. ഇതില് വാദം കേള്ക്കുന്നത് വരെ ചോദ്യം ചെയ്യലിന് ഹാജരാകുന്നതില് നിന്നും ഒഴിവാക്കണമെന്നാണ് ഇ.ഡിയോട് റിയ അഭ്യര്ത്ഥിച്ചിരിക്കുന്നത്.
നിയമവിരുദ്ധ സാമ്പത്തിക ഇടപാട് നടന്നതായി സുശാന്തിന്റെ കുടുംബം പരാതിപ്പെട്ടിരുന്നു. സുശാന്തിന്റെ അക്കൗണ്ടില് നിന്ന് പതിനഞ്ച് കോടി രൂപ റിയ വകമാറ്റിയെന്നും, നിയമവിരുദ്ധ സാമ്പത്തിക ഇടപാടുകള്ക്ക് ഈ പണം ഉപയോഗിച്ചെന്നുമായിരുന്നു കുടുംബത്തിന്റെ ആരോപണം. കഴിഞ്ഞ ദിവസങ്ങളില് റിയയുടെ ഹൗസ് മാനേജര് സാമുവല് മിറന്ഡയെ എന്ഫോഴ്സ്മെന്റ് ചോദ്യം ചെയ്തിരുന്നു.
Comments