കറാച്ചി: ഇംഗ്ലണ്ടിനെതിരെ ജയിക്കാമായിരുന്ന മത്സരം പാക് ടീം കൈവിട്ടതിനെ വിമര്ശിച്ച് മുന് ക്യാപ്റ്റനും ബൗളറുമായ ഷൊഐബ് അക്തര്. പാകിസ്താന് ടീം തോല്വി ചോദിച്ചു വാങ്ങിയതാണെന്നാണ് മുന്താരത്തിന്റെ പരാതി. രണ്ടാം ഇന്നിംഗിസിലെ ബാറ്റിംഗ് പരാജയം ടീമിന്റെ തോല്വിയ്ക്ക് കാരണമായെന്നും അക്തര് പറഞ്ഞു. ആദ്യ ഇന്നിംഗ്സില് 156 റണ്സെടുത്ത ഷാന് മസൂദ് പൂജ്യത്തിനും 69 റണ്സെടുത്ത ബാബര് അസം 5 റണ്സിനും പുറത്തായതോടെ പാകിസ്താന് 169ല് തകര്ന്നു.
പരമ്പരയുടെ ആദ്യ ടെസ്റ്റാണ് പാകിസ്താന് ആതിഥേയര്ക്ക് അടിയറവെച്ചത്. ആദ്യ ഇന്നിംഗ്സില് 326 റണ്സെടുത്ത പാകിസ്താന് ഇംഗ്ലണ്ടിനെ 219ല് പുറത്താക്കി ശക്തമായ തിരിച്ചടിയാണ് നല്കിയത്. എന്നാല് രണ്ടാം ഇന്നിംഗ്സില് അവിശ്വസനീയമായ ബാറ്റിംഗ് തകര്ച്ചയാണ് പിന്നീട് പാകിസ്താനുണ്ടായത്. വെറും 169 റണ്സിനാണ് സന്ദര്ശകര് ഇംഗ്ലണ്ടിന് മുന്നില് വീണത്. തുടര്ന്ന് ജയിക്കാന് വേണ്ട 277 റണ്സ് ഇംഗ്ലണ്ട് 7 വിക്കറ്റുകള് നഷ്ടപ്പെടുത്തി അടിച്ചെടുത്തു. മുന്നിര തകര്ന്നിട്ടും മധ്യനിരയില് ബട്ലറും(75) വോക്സും(84) ചേര്ന്നു കരുതലോടെ നടത്തിയ ബാറ്റിംഗാണ് ടീമിനെ ടെസ്റ്റ് ജയം സമ്മാനിച്ചത്. രണ്ടു കളികളിലായി 8 വിക്കറ്റുകള് വീഴ്ത്തിയ യാസിര് ഷാ തിളങ്ങിയെങ്കിലും ബാറ്റിംഗിലെ പരാജയമാണ് പാകിസ്താന് വിനയായത്.
