മഥുരയിലും വൃന്ദാവനത്തിലും വലിയ ആഘോഷപരിപാടികളോടെ നടക്കുന്ന ഉത്സവമാണ് ജന്മാഷ്ടമി. ശ്രീകൃഷ്ണൻ അർധരാത്രിയിൽ ജനിച്ചതിനാൽ ഘടികാരത്തിൽ 12 മണിയാവുമ്പോൾ ഭക്തർ നോമ്പ് ആരംഭിക്കും. കൂടാതെ ശ്രീകൃഷ്ണ ഭഗവാനെ ഭജിച്ചുകൊണ്ടുള്ള നാമങ്ങളും ജപിക്കും.
ജന്മാഷ്ടമി ഉപവാസം
ശ്രീകൃഷ്ണ ഭഗവാനെ അകമഴിഞ്ഞ ഭക്തിയോടെ ആരാധിക്കുന്നവർ കൃഷ്ണ ജന്മാഷ്ടമി ദിവസം ഉപവാസം അനുഷ്ഠിക്കും. ആചാരപ്രകാരം ചിലർ ജന്മാഷ്ടമിക്ക് മുമ്പ് ദിവസത്തിൽ ഒരു നേരം മാത്രമേ ഭക്ഷണം കഴിക്കുകയുള്ളൂ. മറ്റുചിലർ പൂർണമായും ഉപവസിക്കുകയും അടുത്ത ദിവസം വ്രതം മുറിച്ച് ഭക്ഷണം കഴിക്കുകയും ചെയ്യും.
ജന്മാഷ്ടമി ചരിത്രം
മഹാവിഷ്ണുവിന്റെ എട്ടാമത്തെ അവതാരമായ ശ്രീകൃഷ്ണ ഭഗവാന്റെ ജന്മദിനമാണ് ശ്രീകൃഷ്ണ ജന്മാഷ്ടമി. ചിങ്ങത്തിലെ രോഹിണി നക്ഷത്രവും അഷ്ടമിയും ഒത്തുചേർന്ന ദിവസമാണ് മഹാവിഷ്ണു ശ്രീകൃഷ്ണ ഭഗവാനായി അവതരിക്കുന്നത്.
തന്റെ പ്രിയ സഹോദരി ദേവകിയെയും വസുദേവരെയും വിവാഹശേഷം ഭർതൃഗൃഹത്തിലേക്ക് കൊണ്ടുപോകും വഴി കംസന് ഒരു അശരീരി ഉണ്ടായി. സഹോദരി ദേവകിയുടെ എട്ടാമത്തെ പുത്രൻ കംസനെ വധിക്കും എന്നായിരുന്നു അത് . ശേഷം വിവാഹഘോഷയാത്ര മഥുരയിലേക്ക് തിരിച്ച് പോകാൻ കംസൻ ആജ്ഞാപിച്ചു. തുടർന്ന് ഇരുവരെയും കംസൻ തടവിലാക്കുകയും ദേവകി ജന്മം നൽകിയ ആറ് കുഞ്ഞുങ്ങളെ കംസൻ വധിക്കുകയുമുണ്ടായി. ഏഴാമത്തെ കുഞ്ഞായിരുന്ന ബാലരാമനെ ദേവകിയുടെ ഉദരത്തിൽ നിന്നും വസുദേവരുടെ രണ്ടാമത്തെ ഭാര്യയായ രോഹിണിയിലേക്ക് മാറ്റപ്പെട്ടു. പേമാരിയും കൊടുങ്കാറ്റുമുണ്ടായിരുന്ന ഒരു രോഹിണി നാളിൽ മഹാവിഷ്ണുവിന്റെ അവതാരമായ ശ്രീകൃഷ്ണ ഭഗവാൻ ജന്മമെടുത്തു. മഹാവിഷ്ണുവിന്റെ ഉപദേശമനുസരിച്ച് വസുദേവർ അമ്പാടിയിലുള്ള നന്ദഗോപരുടെയും യശോദയുടെയും അടുത്ത് കുഞ്ഞിനെ എത്തിക്കുകയും നന്ദഗോപരുടെ പത്നി ജന്മം നൽകിയ പെൺകുഞ്ഞിനെ ദേവകിയുടെ അടുത്തേക്ക് കൊണ്ടുവരികയും ചെയ്തു. ശ്രീകൃഷ്ണ ഭഗവാനെ അമ്പാടിയിൽ എത്തിക്കുന്ന വേളയിൽ പെയ്തിരുന്ന പേമാരിയിൽ കുഞ്ഞിന് സംരക്ഷണം നൽകാൻ മഹാവിഷ്ണു വൈകുണ്ഡത്തിൽ വളർത്തിയ ആദിശേഷൻ എന്ന പാമ്പും കൂടെയുണ്ടായിരുന്നു. വസുദേവർ യമുനാനദീതീരത്ത് എത്തിയതും അത്ഭുതകരമാംവണ്ണം നദി ഇരുവശങ്ങളിലേക്കും വഴിമാറുകയും വസുദേവർക്ക് നടന്നുപോകുംവിധത്തിലുള്ള പാത ഉണ്ടാവുകയും ചെയ്തു. ദേവകിക്ക് കുഞ്ഞ് ജനിച്ച വിവരം അറിഞ്ഞയുടൻ കംസൻ കുഞ്ഞുബാലികയെ വധിക്കാൻ തീരുമാനിച്ചു. എന്നാൽ ബാലിക ആകാശത്തിലേക്ക് പറന്നുയർന്നു. ആ ബാലിക ദുർഗാദേവിയായി പ്രത്യക്ഷപ്പെട്ടു. ശേഷം “നിന്റെ അന്തകൻ ഭൂമിയിൽ ജനിച്ചു” എന്ന് കംസനോട് പറയുകയും ചെയ്തു.
കംസനിഗ്രഹണത്തിനായി ജന്മമെടുത്ത ശ്രീകൃഷ്ണ ഭഗവാന്റെ ജന്മദിനം ആണ് ജന്മാഷ്ടമിയായി ഭക്തർ ആഘോഷിക്കുന്നത്.
വൃന്ദാവനത്തിലെ ഗോപികമാർ വെണ്ണകൊതിയനായ കണ്ണൻ വെണ്ണയെടുക്കാതിരിക്കാൻ ഉയരത്തിലാണ് വെണ്ണ സൂക്ഷിച്ചിരുന്നത്. എന്നാൽ വെണ്ണയെടുക്കാൻ കണ്ണൻ പല വഴികളും കണ്ടെത്തി. കണ്ണന്റെ ഈ വെണ്ണയെടുക്കൽ ആണ് ഇന്നും ജന്മാഷ്ടമി നാളിൽ ഉറിയടിയായി കൊണ്ടാടുന്നത്.
Comments