ബിഗ് ബിയുടെ മനസ് കീഴടക്കിയ കണ്ണൂർക്കാരി ആര്യ ദയാലിന്റെ പുതിയ പരീക്ഷണവും ആരാധകർ നിറകൈയടികളോടെ ഏറ്റെടുത്തിരിക്കുകയാണ്. സിഐഡി മൂസ എന്ന ചിത്രത്തിലെ ഗാനവും നെറ്റ്ഫ്ലിക്സിൽ തരംഗമായ ബെല്ലാ ചാവോ എന്ന ഗാനവും സംയോജിപ്പിച്ചാണ് ആര്യ തന്റെ പുതിയ പരീക്ഷണം നടത്തിയിരിക്കുന്നത്.
കർണാടിക് സംഗീതവും പോപ് സംഗീതവും കൂട്ടിയോജിപ്പിച്ച് വ്യത്യസ്തതയുള്ള ഒരു കോമ്പോ സൃഷ്ടിച്ചെടുക്കുന്ന രീതിയാണ് ആര്യ ദയാലിന്റേത്. സ്വന്തമായി പഠിച്ചെടുത്ത ഉക്കുലേലേ എന്ന സംഗീതോപകരണത്തിന്റെ അകമ്പടിയോടുകൂടിയാണ് പാട്ടുകളെല്ലാം ആര്യ പാടുന്നത്. സഖാവ് എന്ന കവിത ആലപിച്ചതോടെ കൈയിലെടുത്ത ആര്യ ദയാൽ സഖാവ് ഗായിക എന്ന പേരിലാണ് അറിയപ്പെട്ടിരുന്നത്.
‘സഖാവ്’ കവിതയ്ക്ക് ശേഷം ‘ട്രൈ മൈസെൽഫ്’ എന്ന പാട്ട് സ്വന്തമായി എഴുതി കമ്പോസ് ചെയ്തിരുന്നു. പിന്നീട് ലോക്ക് ഡൗൺ കാലഘട്ടത്തിൽ ആര്യ ചെയ്ത കർണാട്ടിക്, വെസ്റ്റേൺ ഫ്യൂഷനാണ് ജനങ്ങൾ ഏറ്റെടുത്തത്. എല്ലാത്തരം സംഗീതവും ഇഷ്ടപ്പെടുന്ന ആളാണ് ആര്യ ദയാൽ. പോപ്പ്, മെറ്റൽ, കഥകളി പദം, കർണാടക സംഗീതം, ഹിന്ദുസ്ഥാനി തുടങ്ങി എല്ലാ പാട്ടുകളും ഈ യുവ ഗായികയ്ക്ക് പ്രിയപ്പെട്ടതാണ്. ആര്യ പുറത്തിറക്കുന്ന ഇത്തരം സംഗീത വിഡിയോകൾക്കെല്ലാം സമൂഹ മാധ്യമങ്ങളിൽ വലിയ സ്വീകാര്യതയാണ് ലഭിക്കുന്നത്. സ്വന്തമായി യുട്യൂബ് ചാനലും ആര്യയ്ക്കുണ്ട്.
ആര്യ പോസ്റ്റ് ചെയ്യുന്ന വിഡിയോകൾക്ക് ലക്ഷ കണക്കിനാളുകളാണ് ആസ്വാദകരായുള്ളത്. അമിതാഭ് ബച്ചനടക്കമുള്ള സെലിബ്രിറ്റികൾ ആര്യ ദയാലിന്റെ വീഡിയോ ഷെയർ ചെയ്തിരുന്നു. കോവിഡ് ബാധിച്ച് ചികിത്സയിൽ കഴിയവേ വിരസമായ തന്റെ ആശുപത്രി ദിനങ്ങളെ തെളിച്ചമുള്ളതാക്കിയെന്നാണ് സാക്ഷാൽ ബിഗ് ബി സമൂഹ മാധ്യമങ്ങളിൽ ആര്യയുടെ പാട്ടിനെപ്പറ്റി കുറിച്ചത്.
Comments