ന്യൂഡല്ഹി: രാജ്യത്തെ പ്രതിരോധ മേഖലയ്ക്ക് കരുത്തു പകരാനൊരുങ്ങി കേന്ദ്ര സര്ക്കാര്. ഇസ്രായേലില് നിന്നും ഇന്ത്യ വാങ്ങിയ ഹെറോണ് ഡ്രോണുകളില് ആയുധം ഘടിപ്പിക്കാനുള്ള പദ്ധതിയ്ക്ക് അംഗീകാരം നല്കി ഡിഫന്സ് അക്വിസിഷന് കൗണ്സില്. ഇന്ത്യാ ചൈനാ അതിര്ത്തി സംഘര്ഷത്തിന്റെ പശ്ചാത്തലത്തിലാണ് ഹെറോണ് ഡ്രോണുകളില് ആയുധം ഘടിപ്പിക്കാനുള്ള പ്രൊജക്ട് ചീറ്റ എന്ന പദ്ധതി വേഗത്തില് നടപ്പിലാക്കാനൊരുങ്ങുന്നത്.
നിലവില് ആകാശ നിരീക്ഷണത്തിന് മാത്രമായി ഉപയോഗിക്കുന്ന ഹെറോണ് ഡ്രോണുകളില് ലേസര് നിയന്ത്രിത ബോംബുകള്, ടാങ്ക് വേധ മിസൈലുകള്, തുടങ്ങിയവയാണ് ഘടിപ്പിക്കാനൊരുങ്ങുന്നത്. 3,500 കോടി രൂപയുടേതാണ് പദ്ധതി. 90 ഹെറോണ് ഡ്രോണുകളാണ് നിലവില് ഇന്ത്യയുടെ കൈവശമുള്ളത്. അതിര്ത്തി മേഖലയിലെ നിരീക്ഷണത്തിനായാണ് ഇവയെ ഉപയോഗിക്കുന്നത്. സൈനിക നടപടിക്കിടെ ലക്ഷ്യ നിര്ണയത്തിനും ഇവയെ ഉപയോഗിക്കാറുണ്ട്.
ഹെറോണ് ഡ്രോണുകളില് ആയുധം ഘടിപ്പിച്ചാല് ലക്ഷ്യത്തിലേക്ക് ആക്രമണം നടത്താനും പലതവണ ഉപയോഗിക്കാനും കഴിയും. ഹെറോണ് ഡ്രോണുകള്ക്ക് പുറമെ അമേരിക്കയില് നിന്നും 30 പ്രഡേറ്റര് ഡ്രോണുകള് കൂടി വാങ്ങാനുള്ള തയ്യാറെടുപ്പിലാണ് പ്രതിരോധ മന്ത്രാലയം. പ്രതിരോധ സേനകള്ക്ക് വേണ്ടി 6.71 ലക്ഷം എ കെ 203 തോക്കുകള് വാങ്ങാനുള്ള പദ്ധതിയ്ക്കും ഡിഫന്സ് അക്വിസിഷന് കമ്മിറ്റി അനുമതി നല്കിയിട്ടുണ്ട്.
വ്യോമസേനയ്ക്കായി എച്ച് എ എല്ലില് നിന്നും 106 ട്രെയിനര് ജെറ്റുകള് വാങ്ങാനും നാവികസേന, തീര സംരക്ഷണ സേന എന്നിവയ്ക്കായി ഭെല്ലില് നിന്നും കപ്പലുകളില് ഘടിപ്പിക്കാവുന്ന മീഡിയം റേഞ്ച് പീരങ്കികള് വാങ്ങാനും തീരുമാനമായിട്ടുണ്ട്.
