ന്യൂഡല്‍ഹി: ഇന്ത്യയുടെ 74-ാം സ്വാതന്ത്ര്യദിനാഘോഷത്തിനായി ഡല്‍ഹിയിലെ ഒരുക്കങ്ങള്‍ തുടങ്ങി. സൈനിക വിഭാഗങ്ങളുടെ പരിശീലനവും സ്വാതന്ത്ര്യദിനത്തിലെ ഔദ്യോഗിക പരിപാടികളുടെ അതേ മാതൃകയിലുള്ള പരിശീലനവുമാണ് ഇന്ന് നടക്കുന്നത്.
ഷാജഹാനാബാദ് മുതല്‍ ചുവപ്പുകോട്ടവരെയുള്ള ഭാഗത്ത് ഇന്ന് പരിശീലനങ്ങള്‍ നടക്കും. സൈനികവിഭാഗങ്ങളുടെ മാര്‍ച്ച് പാസ്റ്റും പ്രധാനമന്ത്രി സംസാരിക്കുന്ന ദിവസത്തെ എല്ലാ പരിപാടികളും അതേ മാതൃകയില്‍ ഇന്ന് പരിശീലിക്കുമെന്ന് കേന്ദ്ര ആഭ്യന്തര മന്ത്രാലയം അറിയിച്ചു.
ലോഹോറി ഗേറ്റിലാണ് ഡല്‍ഹിയിലെ പതാക ഉയര്‍ത്തല്‍ ചടങ്ങ് നടക്കുന്നത്. കൊറോണ പ്രോട്ടോക്കോള്‍ കാരണം ഇത്തവണ ആകെ അതിഥികള്‍ 250 ആയി ചുരുക്കി. 3000 സ്‌ക്കൂള്‍ വിദ്യാര്‍ത്ഥികള്‍ പങ്കെടുക്കാറുള്ളത് ഇത്തവണ പൂര്‍ണ്ണമായും ഒഴിവാക്കി. പകരം എന്‍.സി.സി കേഡറ്റുകള്‍ മാത്രമാണ് പങ്കെടുക്കുക.
സൈനിക വിഭാഗങ്ങളുടെ ഗാര്‍ഡ് ഓഫ് ഓണര്‍, വാദ്യസംഗീത വിഭാഗത്തിന്റെ അഭിവാദനം, ഡല്‍ഹി പോലീസിന്റെ പ്രത്യേക മാര്‍ച്ച് എന്നിവയും ഇന്ന് പരിശീലനത്തിന്റെ ഭാഗമായി നടക്കും. കനത്ത സുരക്ഷയിലാണ് എല്ലാ പരിപാടികളുംനടക്കുക.
കൊറോണ പോരാളികളായി തിരഞ്ഞെടുക്കപ്പെട്ട ആരോഗ്യപ്രവര്‍ത്തകര്‍, പോലീസുകാര്‍, പ്ലാസ്മാ ദാതാക്കള്‍ എന്നിവരെ ഡല്‍ഹി സ്വാതന്ത്രദിനത്തില്‍ പ്രത്യേകം ക്ഷണിച്ചിട്ടുണ്ടെന്ന് പ്രതിരോധ സെക്രട്ടറി അജയ് കുമാര്‍ അറിയിച്ചു.
ആത്മനിര്‍ഭര ഭാരത് വിഷയത്തിലൂന്നിയാകും പ്രധാനമന്ത്രിയുടെ പ്രഭാഷണമെന്ന് ദേശീയമാദ്ധ്യമങ്ങള്‍ സൂചിപ്പിക്കുന്നു. കഴിഞ്ഞ വര്‍ഷം ജമ്മുകശ്മീരില്‍ നിന്ന് 370, 35 എ വകുപ്പുകള്‍ നീക്കിയതിന്റെ പശ്ചാത്തലത്തിലായിരുന്നു പ്രധാനമന്ത്രിയുടെ പ്രസംഗം.
