നായയും പൂച്ചയും തമ്മിൽ സൗഹാർദപരമായ ഒരു അന്തരീക്ഷം എന്നുള്ളത് വളരെ അപൂർവമായി മാത്രം കാണാവുന്ന ഒന്നാണ് കാരണം അവർ ആജന്മശത്രുക്കളാണ് എന്നാണ് കരുതി പോരുന്നത് . നായ പൂച്ചയുടെ ശിഷ്യത്വം സ്വീകരിച്ചതും, മരം കയറാനുള്ള വിദ്യ ഒഴിച്ച് ബാക്കിയെല്ലാം പൂച്ച നായക്ക് പറഞ്ഞു കൊടുത്തതുമായ ഒരു കഥ നമ്മൾ കേട്ടിട്ടുണ്ട് .
അത്രയ്ക്ക് അകലം ഈ രണ്ടു മൃഗങ്ങൾക്കുമിടയിൽ ഉണ്ട് എന്നുള്ള വസ്തുതയെ തിരുത്തി കൊണ്ടാണ് ഒരു നായയും പൂച്ചയും പ്രണയത്തിലായത് .
കേസി എന്ന് പേരുള്ള വ്യക്തിയുടെ നായയാണ് പൂച്ചയുമായി അഗാധ പ്രണയത്തിലായത് . കേൾക്കുമ്പോൾ തന്നെ നമുക്ക് അത്ഭുതം തോന്നാം . നമ്മുടെ ഒക്കെ കാഴ്ചപ്പാടിൽ പൂച്ചയും നായയും ആജന്മശത്രുക്കളാണ് . പോരാത്തതിന് മൃഗങ്ങൾ പ്രണയിക്കുകയോ ? എന്ന ചോദ്യവും മനസ്സിൽ ഉയരാം . എന്നാൽ ഇത് യാഥാർഥ്യമാണ് . മനുഷ്യരെ പോലെ തന്നെ മൃഗങ്ങൾക്കും പ്രണയിക്കാൻ അറിയാം .
ഒരിക്കൽ തന്റെ നായ മണിക്കൂറുകളോളം ജനലിൽ കൂടി വെളിയിലേക്കു നോക്കിയിരിക്കുന്നത് കേസിയുടെ ശ്രദ്ധയിൽ പെട്ടിരുന്നു . ആദ്യമൊന്നും അവർ അത് കാര്യമാക്കിയിരുന്നില്ല . എന്നാൽ ദിവസവും കൃത്യമായ ഇടവേളകളിൽ മൂന്ന് നേരവും നായ ജനാലയിൽ കൂടി നോക്കി നിൽക്കുന്നത് അവരിൽ അത്ഭുതം ജനിപ്പിച്ചു .
എന്താണ് നായ നോക്കുന്നത് എന്നറിയാൻ കേസിയും ജനാലയിൽ കൂടി നോക്കുകയുണ്ടായി . എന്നാൽ ഒന്നും തന്നെ ശ്രദ്ധയിൽ പെട്ടില്ല . വീട്ടിലെ കാര്യങ്ങൾ നോക്കുന്നതിനിടയിലും ജോലി തിരക്ക് മൂലവും കേസി പലപ്പോഴും ഈ കാര്യം വിട്ട് പോകുമായിരുന്നു . ഒരു ദിവസം എന്താണ് സംഭവിക്കുന്നത് എന്നറിയാൻ തന്നെ കേസി തീരുമാനിച്ചു .
അണ്ണാനോ മറ്റോ ആയിരിക്കും എന്നാണ് കേസി ആദ്യം കരുതിയത് . എന്നാൽ തന്റെ വീടിന്റെ പരിസരങ്ങളിൽ അണ്ണാൻ ഇല്ലലോ എന്ന് കേസി അപ്പോഴാണ് ചിന്തിച്ചത് . നായ നോക്കുന്ന അതേ ദിശയിൽ തന്നെ കേസിയും നോക്കി . അപ്പോൾ കണ്ടത് അയൽക്കാരന്റെ വീടിന്റെ ജനല്പാളിയിൽ കിടന്നുറങ്ങുന്ന പൂച്ചയെ ആണ് .
തന്റെ നായ മാത്രമാണോ അതോ പൂച്ചയും നായയെ നോക്കുന്നുണ്ടോ എന്നുറപ്പിക്കാൻ അന്ന് തന്നെ പലപ്രാവശ്യം നായക്കൊപ്പം കേസിയും ജനാലയിൽ കൂടി പുറത്തേക്ക് നോക്കി. അപ്പോഴൊക്കെ രണ്ടു പേരും പരസ്പരം ഒരുപാടു നേരം നോക്കി ഇരിക്കുന്നത് കേസിയേ അത്ഭുതപ്പെടുത്തി .
പൂച്ചയുമായി തന്റെ നായ പ്രണയത്തിലാണ് എന്ന കാര്യം അവരെ അത്ഭുത പെടുത്തുക മാത്രമല്ല സന്തോഷിപ്പിക്കുകയും ചെയ്തു .
ദിവസങ്ങൾ കടന്ന് പോകവേ, ഒരു ദിവസം നായ കിടന്നിടത്തു നിന്ന് എഴുന്നേറ്റതുമില്ല ഭക്ഷണം കഴിച്ചതുമില്ല . അസുഖമോ മറ്റും ആയിരിക്കും എന്ന് കരുതി അവർ കേസിയെ ഡോക്ടറുടെ അടുക്കൽ കൊണ്ട് പോയി. എന്നാൽ നായക്ക് കുഴപ്പം ഒന്നുമില്ല എന്ന് ഡോക്ടർ ഉറപ്പിച്ചു പറഞ്ഞു. എന്നാൽ നായ ഭക്ഷണവും കളിയും എല്ലാം ഉപേക്ഷിച്ചു കിടപ്പ് തുടർന്നു .
പിറ്റേ ദിവസം പതിവ് പോലെ ജനാലക്കൽ പോയി നോക്കിയിട്ടു ഉടൻ തന്നെ നിരാശ നിറഞ്ഞ ഭാവത്തിൽ നായ തിരിച്ചു വന്നു കിടന്നു .നായക്ക് എന്ത് പറ്റിയതായിരിക്കും എന്ന് ചിന്തിച്ചു കൊണ്ടിരുന്ന കേസി പൂച്ചയുടെ കാര്യം വിട്ട് പോയിരുന്നു . പൂച്ചയുടെ കാര്യം ഓർമ്മ വന്ന കേസി ജനാലയിൽ കൂടി നോക്കിയപ്പോൾ കണ്ടത് അയൽക്കാരന്റെ ജനൽ പാളികളിൽ മുഴുവൻ ചെടികൾ വെച്ചിരിക്കുന്നതാണ് . പൂച്ചയെ കാണാൻ സാധിക്കാത്തതാണ് നായയുടെ സങ്കടം എന്ന് മനസിലാക്കിയ കേസി അവനെ സന്തോഷിപ്പിക്കാൻ പല കാര്യങ്ങളും ചെയ്തു .
പുറത്തു കൊണ്ട് പോവുക , കൂടെ കളിക്കുക , സ്പെഷ്യൽ ഭക്ഷണം കൊടുക്കുക , പുതിയ കളിപ്പാട്ടങ്ങൾ വാങ്ങി കൊടുക്കുക തുടങ്ങി പലതും . എന്നാൽ ഇതൊന്നും നായയെ സന്തോഷിപ്പിച്ചില്ല .
ഒടുവിൽ തന്റെ നായയെ സന്തോഷിപ്പിക്കാൻ കേസി അയൽക്കാരൻ കാണത്തക്ക രീതിയിൽ അയാളുടെ പൂച്ചയും തന്റെ നായയും തമ്മിലുള്ള പ്രണയകഥയും , അവരുടെ സന്തോഷത്തിനായി ചെടിച്ചട്ടികൾ മാറ്റിയാൽ നന്നായിരിക്കും എന്നെഴുതുകയും ചെയ്ത ഒരു കത്ത് ജനാലയിൽ ഒട്ടിച്ചു വെച്ചു . എന്തായിരിക്കും അയാളുടെ പ്രതികരണം എന്ന ആശങ്കയിൽ ഇരുന്ന കേസിയെ വരവേറ്റത് അത്ഭുതാവഹമായ മറുപടി ആയിരുന്നു . ‘ ശുദ്ധമായ പ്രണയത്തിനു വേണ്ടി ‘എന്നെഴുതിയ ഒരു കുറിപ്പ് ജനാലയിൽ ഒട്ടിച്ചു വെച്ചിരിക്കുന്നു കൂടാതെ അദ്ദേഹം ചെടിച്ചട്ടികൾ മുഴുവൻ ജനൽ പാളികളിൽ നിന്ന് എടുത്തു മാറ്റുകയും ചെയ്തിരിക്കുന്നു.
ഇത് പോലെ മൃഗങ്ങളെ മനസിലാക്കുകയും അവരുടെ സന്തോഷത്തിനു വേണ്ടി എന്തും ചെയ്യുന്ന ഉടമസ്ഥർ ഈ ലോകത്ത് ധാരാളം ഉണ്ട് . ഇവരെ കൂടാതെ അഗാധമായ പ്രണയവും സൗഹൃദവും പങ്കു വെക്കുന്ന നായ്ക്കളുടെയും പൂച്ചകളുടെയും കഥകളിൽ ഒന്ന് മാത്രമാണിത് ..
