തലകുത്തി നിന്ന് ചിത്രം വരയ്ക്കുന്നവര് എന്നൊക്കെ അതിശയോക്തിയായി നമ്മള് പറയാറുണ്ട് എന്നാല് അനസിന്റ കാര്യത്തില് ഇത് വെറും പെരുപ്പിച്ചു കാട്ടലല്ല. ഉള്ള കാര്യം തന്നെയാണ്. ഒരേ സമയം കൈകളും കാലുകളും കൊണ്ട് തലകുത്തി നിന്നു ചിത്രം വരയ്ക്കുന്ന അനസ് കാണുന്നവര്ക്കെല്ലാം അതിശയമായി മാറിയിരിക്കുകയാണ്.
വിവിധതരത്തിലുള്ള ചിത്രങ്ങള് അനസ് തന്റെ കൈകളും കാലുകളും കൊണ്ട് ഒരേ സമയം വരച്ചു പൂര്ത്തിയാക്കിയിട്ടുണ്ട്. എന്നാല് ഇപ്പോള് സോഷ്യല് മീഡിയ വഴി വൈറലാകുന്നത് അനസ് വരച്ച പ്രശസ്തമായ ഒരു താര കുടുംബത്തിന്റെ ചിത്രമാണ്.
മലയാള സിനിമയില് വളരെ പ്രശസ്ത താരമായ സുകുമാരന്റെയും ഭാര്യയും നടിയുമായ മല്ലികാ സുകുമാരന്റെയും ഇവരുടെ മക്കളും മലയാള സിനിമയില് തിളങ്ങി നില്ക്കുന്ന താരങ്ങളുമായ ഇന്ദ്രജിത്തിന്റെയും പൃഥ്വിരാജിന്റെയും ചിത്രങ്ങളുമാണ് ഇപ്പോള് സാഷ്യല് മീഡിയയിലൂടെ വൈറലായി കൊണ്ടിരിക്കുന്നത്.
ചുമരിന്റെ നാലു കോണുകളിലായാണ് അനസ് ചിത്രങ്ങള് വരച്ചിരിക്കുന്നത്. താഴത്തെ ചുമരുകളില് കൈകള് കൊണ്ട് സുകുമാരന്റെയും മല്ലികാ സുകുമാരന്റെയും ചിത്രങ്ങള് വരച്ചപ്പോള് അതേ സമയം ചുമരിനു മുകളില് കാലുകള് കൊണ്ട് ഇന്ദ്രജിത്തിന്റെയും പൃഥ്വിരാജിന്റെയും ചിത്രങ്ങള് വരച്ചു. ഒരേ സമയത്താണ് നാലു പേരുടേയും ചിത്രങ്ങള് അനസ് വരച്ചു തീര്ത്തത്.
വിജയ് സേതുപതി ഉള്പ്പെടെ ഒരുപാട് താരങ്ങളുടെ ചിത്രം ഇത്തരത്തില് വരച്ചിട്ടുണ്ടെങ്കിലും പൃഥ്വിരാജ് സമൂഹമാദ്ധ്യമങ്ങളിലൂടെ ഈ വീഡിയോ പങ്കുവെച്ചതോടെയാണ് അനസിന്റെ തലകുത്തി പ്രകടനം വൈറലായത്.
ചിത്രം വൈറലായതോടു കൂടി അനസിന് ആരാധകരുടെ പെരുമഴയാണ്. ഇത്തരം കഴിവുള്ള ഒരു പ്രതിഭയെ അധികമാരും കാണാനിടയില്ല. സമൂഹമാദ്ധ്യമങ്ങളിലൂടെ, പൃഥ്വിരാജ് എന്ന താരത്തിലൂടെ തന്നെ പുറം ലോകം അറിഞ്ഞ സന്തോഷത്തിലാണ് അനസ്.
